Баруун болон зүүн коридорын төмөр замын төслийн тухай болон Алтан булаг, Улаанбаатар, Замын-Үүд чиглэлийн хурдны авто замын төслийн талаар Зам тээврийн хөгжлийн сайд Л.Халтар мэдээлэл хийлээ. Тэрбээр “Зам тээврийн салбартай холбоотой хоёр гол асуудал яригдлаа. Нэгдүгээрт, төмөр замын төслүүдийг цаашид хэрхэн явуулах тухай хэлэлцсэн. Өөрөөр хэлбэл, 2013 онд Монгол улсын засгийн газраас гарсан 28 дугаар тогтоолын хэрэгжилтийг эрчимжүүлэх тухай Засгийн газар дээр хэлэлцэж батлагдлаа. Хоёрдугаарт, Шинэ сэргэлтийн бодлогын бичиг баримтад туссан. Монгол улсын баруун, зүүн босоо чиглэлийн төмөр замын бүтээн байгуулалттай холбоотой барих ашиглах, шилжүүлэх нөхцөлтэйгөөр Монголын төмөр зам төрийн өмчид компанид үргэлжлүүлэн олгож, энэ ажиллагааг эрчимжүүлэх тухай шийдвэр гарсан.

Тухайлбал, Баруун босоо чиглэлийн төмөр зам нь Арцсуурь-Нарийнсухайт-Шивээхүрэн чиглэлийн 1,255 км зам юм. Харин зүүн босоо чиглэл дээр Чойбалсан-Хөөт-Бичигт чиглэлд 420 км зам баригдахаар төлөвлөгдөж байна. Төсөл хэрэгжиж дууссаны дараа манай улс 4,700 км урттай төмөр замын сүлжээтэй болох бөгөөд шинээр баригдах нь 2,700 км орчим байх юм. 2022 оны эхний хагаст Тавантолгой-Гашуунсухайт чиглэлийн төмөр замын тээвэрлэлтийг явуулна. Тавантолгой-Зүүнбаян чиглэлийн төмөр замыг мөн ашиглалтад оруулна. Богдхан төмөр замын бүтээн байгуулалтын ажлаа эрчимжүүлэх, Улаанбаатар төмөр замын суурь бүтцийн шинэчлэл дээр төр мөнгөө гаргаж, бодлогоор үргэлжлүүлээд явах юм.  Мөн Засгийн газрын үйл ажиллагааны мөрийн хөтөлбөрт тусгагдсан Алтанбулаг- Замын-Үүд чиглэлийн хурдны замын асуудлыг өнөөдөр хэлэлцэж, олон улсад нээлттэй тендер зарлахаар болсон. Мөн 2022 оны хоёрдугаар сарын 15-ны дотор багтааж олон улсын тендер зарлах чиглэлийг Ерөнхий сайд өгсөн” гэлээ.