МАХН-ынхан МАХН-ын дарга Н.Энхбаярыг хилсээр хоригдож байгаа хэмээн Ерөнхийлөгч Ц.Элбэгдорж, Улсын дээд шүүхийн Ерөнхий шүүгч Ц.Зориг, Ерөнхий прокурор Д.Дорлигжав нарт хандан мэдэгдэл гаргаад байгаа юм. Уг мэдэгдлийг бүрэн эхээр нь нийтэлж байна. “Монгол Улсын гуравдахь Ерөнхийлөгч, МАХН-ын дарга, “МАХН-МҮАН-ын Шударга ёс эвсэл”-ийн тэргүүн Н.Энхбаярыг Монголын түүхэнд урьд өмнө хэзээ ч гарч байгаагүй зэрлэг балмадаар баривчилж, улмаар захиалгат зохиомол хэрэг тулган Сүхбаатар дүүргийн шүүхээс ялласныг Нийслэлийн давж заалдах шатны шүүх хэвээр үлдээсэн нь Монголын нийгмийг цочирдуулж хууль, шударга ёсыг уландаа гишгэсэн ноцтой үйлдэл боллоо гэж Монгол Ардын Хувьсгалт нам үзэж байна.
Монголын шүүх эрх мэдлийн байгууллагууд өрсөлдөгчөө замаасаа зайлуулж ямар ч үнээр хамаагүй дарж авах гэсэн улстөр, бизнесийн тодорхой бүлэглэлийн гар хөл болон хувирч байгааг нэн тодорхой харууллаа. Хэнээс ч хараат бус байж, гагцхүү хуульд захирагдах Үндсэн хуулийн үзэл санаагаа умартан гэмт хэргийн бүрэлдэхүүнгүйг мэдсээр байж МАХН-ын дарга Н.Энхбаярт зохиомол хэрэг үүсгэн ялласан Сүхбаатар дүүргийн шүүхийн Ерөнхий шүүгч С. Соёмбо-Эрдэнэ, шүүгч С. Оюунчимэг, М. Алдар, Нийслэлийн шүүхийн Ерөнхий шүүгч Б. Сарантуяа, шүүгч Х. Эрдэнэсувд, Г. Алтанчимэг нар XXI зууны ардчилсан Монгол Улсын шинэхэн түүхэнд өнгөрсөн гучин долоо, найман оны хэлмэгдүүлэлтийн хар сүүдрийг нүүрлүүлсэнд манай нам туйлаас харамсаж байна.
Н. Энхбаяр нарт төлөвлөж, оногдуулсан ял ямар ч үндэслэл, нотлох баримтгүй, байтал тэднийг заавал ял шийтгэх гэсэн дээд албан тушаалтнуудынхаа өгсөн үүрэг даалгаварыг биелүүлэх гэж арга ядан зүтгэж байгаа анхан болон давж заалдах шатны шүүхийн хэдэн шүүгчдийн хууль зөрчсөн үйл ажиллагаа монголын ард түмэнд ил тод харагдлаа.
Монгол Улсын Үндсэн хууль, Монгол Улсын нэгдэн орсон олон улсын хүний эрхийн түгээмэл тунхаглал, гэрээ, конвенц, Монгол Улсын Эрүүгийн болон Эрүүгийн байцаан шийтгэх хуулийн холбогдох заалтыг илт зөрчиж, өргөсөн тангаргаасаа няцаж, эрх мэдэлтнүүдийн нөлөөнд автаж хуулийг өөрсдийн үзэмжээр дур мэдэн хэрэглэх замаар хүний эрх, эрх чөлөөнд улаан цайм халдаж, иргэдээ хилсээр ялласан дээрх шүүгчдийн эрээ цээргүй үйлдэл нь Монгол дахь ардчилсан нийгмийн гэрэлт ирээдүй, шударга шүүхэд итгэх иргэдийн итгэлийг унтраалаа. Сүхбаатар дүүрэг, Нийслэлийн шүүхийн энэхүү хууль бус гутамшигт үйлдлийг манай нам Монгол Улсын Үндсэн хуулийн үзэл санаа руу нулимаж нийгэм, төрийн байгуулал, хүний эрх, эрх чөлөө, ардчиллын үнэт зүйлсэд санаатайгаар, зохион байгуулалттайгаар халдсан ноцтой гэмт хэрэг гэж үзэж байна.
МАХН монголын ард түмний үндэсний эрх ашгийг бүхнээс эрхэмлэн дээдэлж шүүх эрх мэдлийн байгууллагуудын алдаа завхрал, хээл хахууль, улстөржсөн захиалгат үйл ажиллагааг эсэргүүцэн ажиллахыг өөрийн мөрийн хөтөлбөрийнхөө нэг чухал хэсэг болгож дэвшүүлсний хувьд энэхүү зорилгоо хэрэгжүүлж Монгол Улсад хараат бус шүүх засаглалыг жинхэнэ утгаар нь цогцлоон байгуулахын төлөө тэмцэнэ гэдгээ ард түмэндээ амалж байна.
Н.Энхбаяр нь тогтворгүй байсан төрийг тогтвортой болгон, эдийн засгийн өсөлт, хөгжлийн үндэс суурийг тавьсан, гадаад улсуудад тавьсан онц их хэмжээний өрийг тэглүүлж, монголчууд эх орныхоо баялагт жинхэнээсээ эзэн байх урьдач нөхцлийг бий болгосон, гадаад харилцааны тогтвортой, олон талт дипломат харилцааг шинэ шатанд гаргасан, уламжлалт шашныг хөгжүүлэх, сурталчилах талаар өөрөөсөө шалтгаалах олон чухал зүйлийг санаачлан хэрэгжүүлсэн, хууль, шударга ёсыг жинхэнэ байдлаар тогтоохын төлөө ажилласан, цаашид ажиллахын төлөө нэгэн үзүүрт сэтгэлээр зүтгэж байгаа төр, нийгмийн зүтгэлтэн билээ.
Эдгээр нандин чанар, тууштай зүтгэлээрээ тэр монголын ард түмний ихэнхийн хайр хүндэтгэлийг хүлээсэн бөгөөд “Ард түмний Ерөнхийлөгчөө аварьяа” хөдөлгөөнд Монгол Улсын 56 мянган иргэн нэгдэн нийлж гарын үсгээ зураад байгаа нь үүний тод илрэл юм. Энэ бол монголын ард түмэн шүүх эрх мэдлийн байгууллагын бусармаг үйлдэл, нэр бүхий дээрх шүүгчид улстөр, бизнесийн тодорхой бүлэглэлийнхний гар хөл болж буйг жигшин зэвүүцэж байгаагийн илэрхийлэл мөн.
Ази тивийн ардчилсан Монгол Улсад болж байгаа өнөөдрийн энэхүү хууль бус үйл ажиллагааг нэн даруй таслан зогсоож, төрийн хуулийг зөрчин, өргөсөн тангаргаасаа няцсан, Үндсэн хуулиар тунхагласан хүний эрх, эрх чөлөөнд албан тушаалаа хэтрүүлэн ашиглаж түрэмгийлэн халдаж байгаа буруутай албан тушаалтнуудтай хатуу хариуцлага тооцохыг Монгол Улсын Ерөнхийлөгч Ц. Элбэгдорж, Монгол Улсын Дээд шүүхийн ерөнхий шүүгч Ц. Зориг, Монгол Улсын Ерөнхий прокурор Д. Дорлигжав нараас МАХН эрс шийдвэртэй шаардаж байна.
Монголд шударга ёсыг тогтоож, Намбарын Энхбаярт оногдуулсан захиалгат зохиомол хэргийг нэн даруй хүчингүй болгох тэмцэлд нэгдэхийг улстөрийн бүх хүчин, иргэний хөдөлгөөнүүд болон олон нийтийн байгууллагууд, хүний эрх, эрх чөлөөг эрхэмлэгч нийт иргэдэд МАХН уриалж байна” гэжээ.
Сэтгэгдэл (8)