Иргэдэд тарааж буй цагаан сарын хэвийн боов болон бусад хүнсний багцын талаар УИХ-ын гишүүн Т.Доржханд, С.Одонтуяа нар хэвлэлийн хурал хийж байна.  Энэ үеэр УИХ-ын гишүүн Т.Доржханд “Хэвийн боов тараадаг, эд өлгийн зүйл тараадаг, санал худалдаж авдаг энэ зүйл хавтгайрлаа. Хоёр сарын өмнө Монгол Улсын 2022 оны төсөв батлагдсан. Гэтэл энэ төсөв дээр үр ашиггүй зардлууд, хавтгайруулсан халамжийн бодлого хэвээрээ байгаа. Маш тодорхой жишээ гэвэл Богд Зонховийн асуудал өнөөдөр хүртэл яригдаж байна.

Ковид ийм хүндрэлтэй, Монголчуудын гурван хүний хоёр нь ажилгүй, ядууралтай байна. Ийм тохиолдолд Богд Зонхова мэтийн цемент зуурдаг, тэгсэн мөртлөө ядуу иргэд, ахмадууддаа цагаан сараар боов, гурил тараадаг. Энэ зүйлийг хязгаарлахгүй бол болохгүй. Энэ бодлого буруу байна. Их хурлын сонгуулийн хууль гэж бий. Үүний 48.1-д Ээлжит сонгуулийн жил эхэлснээс хойш санал авах дуусах хугацаанд ямар нэг эд өлгийн зүйлийг тарааж болохгүй” гэсэн зохицуулалт байдаг. Харин одоогийн хуулийн хүрээнд та юм тарааж болно гэсэн зохицуулалт байгаа. Одоо хоёрхон жилийн дараа дахин УИХ-ын сонгууль болно. Дахин сонгогдохын тулд цагаан сараар бэлэг тарааж байгаа нь буруу.

Үүнд хуулийн хязгаарлалт хийх хэрэгтэй. Та УИХ-ын гишүүн болсон бол ямар нэг эд өлгийн зүйл тараахгүй. Тараасан тохиолдолд та дахин сонгогдох эрхгүй болно, мөн танд эрүүгийн хариуцлага оруулна гэсэн ерөнхий зохицуулалтыг оруулахаар санал болгож байгаа” гэлээ.

Д.Батчулуун