Төрийн байгуулалтын байнгын хорооноос 2021 оны намрын ээлжит чуулганы хугацаанд хийсэн ажлын тайлангаа танилцуулж байна. Тайланг УИХ-ын гишүүн Ж.Мөнхбат танилцууллаа. Тэрбээр “2021 оны намрын ээлжит чуулганы хугацаанд Төрийн байгуулалтын байнгын хороо 13 удаа, дэд хороо нэг удаа, түр хороо нэг удаа хуралдсан байна. Мөн давхардсан тоогоор 349 асуудлыг хэлэлцэн шийдвэрлэсэн. УИХ-ын даргын захирамжаар болон байнгын хорооны тогтоолоор хууль, хуулийн хэрэгжилтэд хяналт тавих үүрэг бүхий долоон ажлыг хэсэг байгуулсан. Ажлын хэсгүүд 43 удаа хуралдаж, ажлын хэсгийн зургаан танилцуулга бэлтгэн, арван тогтоолыг хэлэлцэн баталсан байна. Байнгын хорооны хуралдаанаар 316 хуулийн төслийг, УИХ-ын 14 тогтоолын төслийг хэлэлцсэн. Мөн байнгын хорооны хэлэлцэх эсэхийн 10, эцсийн хэлэлцүүлгийн долоог санал хүсэлт, эцсийн хэлэлцүүлгийн дөрөв, албан тушаалтыг томилох тухай дөрвөн санал дүгнэлт, тайлан мэдээлэл гурав, хууль тогтоолын төслийн талаар 77 саналын томьёоллыг бэлтгэж, чуулганы нэгдсэн хуралдаанаар хэлэлцүүлэн шийдвэрлүүлсэн. Чуулганы нэгдсэн хуралдаанаар байнгын хорооны эрхлэх асуудлын хүрээнд бие даасан нэг, Их хурлын тогтоолын төсөл 14-г шийдвэрлүүлсэн байна. Энэ бол манай байнгын хорооны албан ёсны статистик тоо баримт юм. Монгол улсын их хурлын хяналт шалгалтын тухай хуулийн төсөл болон хамт өргөн мэдүүлсэн хуулийн төслүүд. Хамт өргөн мэдүүлсэн хуульд олон хууль бий. Мөн Монгол улсын засаг захиргаа, нутаг дэвсгэрийн нэгж түүний удирдлагын тухай хуультай бусад хууль тогтоомжийг нийцүүлэх тухай баталсан 127 хуулийн төсөл, журам батлах тухай тогтоолын тухай хуулийн төслийг улсын их хурлын намрын ээлжит чуулганаар хэлэлцсэн байна. Улс төрийн намын тухай хууль болон улс төрийн намын санхүүжилтийн тухай хуулийн төсөл бэлэн болсон. Монгол улсын үндсэн хуульд оруулсан нэмэлт өөрчлөлтийн хүрээнд боловсруулж буй Хот тосгоны эрх зүйн байдлын тухай хуулийн шинэчилсэн найруулгын төсөл, төрийн жинхэнэ албаны сонгон шалгаруулалтын тусгай журмын хуулийн төсөл, төрийн албан хаагчдын ёс зүй, сахилгын тухай хуулийн төслийг боловсруулж өргөн мэдүүлэх бэлтгэлийг хангасан. Үүнийг хаврын чуулганаар хэлэлцэнэ” гэлээ.
