Засгийн газрын өнөөдрийн хуралдаанаар (2022.02.26)  Оюутолгойн уурхайн цахилгаан эрчим хүчний хэрэглээг Монгол Улсын нэгдсэн сүлжээнээс хангах гэрээний төслийн талаар Эрчим хүчний сайд Н.Тавинбэх мэдээллээ. Тэрбээр “Өнөөдрийн Засгийн газрын хуралдаанаар Оюутолгой төслийн цахилгаан эрчим хүчний хэрэглээг дотоодоос хангах ажлын хэсгээс оруулсан гэрээний төслийг дэмжлээ. Энэ төсөл дэмжигдсэн учраас өнөөдөр 17:00 цагт  Оюутолгойн цахилгаан эрчим хүчний хэрэглээг дотоодоос хангах,  цахилгаан эрчим хүч худалдах, худалдан авах гэрээг албажуулахаар тохироод байна. Энэ гэрээ албажвал жилдээ БНХАУ-аас импортоор авч байгаа Оюутолгойн цахилгаан эрчим хүчний төлбөр 120 сая ам.доллартой тэнцэх борлуулалтыг Монгол Улсын эрчим хүчний салбарт авч үлдэх боломж бүрдэнэ. Гэрээний төслийг хоёр ажлын хэсэг багагүй хугацаанд хэлэлцэж бэлдсэн. Энэ гэрээ Тавантолгой дулааны цахилгаан станц, Монгол Улсын эрчим хүчний салбарын техникийн шинэчлэлтийг хийх шаардлагатай хөрөнгө оруулалтыг татахад дэмжлэг болох гэрээ эрх зүйн акт болж чадлаа” гэв.

Д.Батчулуун