Байгаль орчин, хүнс хөдөө аж ахуйн байнгын хорооноос 2021 оны намрын ээлжит чуулганы хугацаанд хийсэн ажлын тайлангаа танилцуулж байна. Тайланг УИХ-ын гишүүн Х.Болорчулуун танилцууллаа. Тэрбээр “Намрын ээлжит чуулганы хугацаанд хууль санаачлагчдаас УИХ-д өргөн мэдүүлсэн хуулиуд, УИХ-ын бусад шийдвэрийн төсөлд санал дүгнэлт гаргах, хяналт шалгалтын үйл ажиллагааг хэрэгжүүлж ажиллаа. Энэ хугацаанд долоон удаа хуралдаж, найман тогтоол баталж, хоёр хяналт шалгалтын ажлын хэсгийн тайланг сонсож ажилласан. Үндсэндээ гурван хуулийн асуудлыг хэлэлцэж, хоёр хуулийн төслийг баталлаа. Үүнд, Засгийн газраас 2016 онд таримал ургамлын үр соортын тухай хуулийн төсөл болон холбогдох нэмэлт хуульд өөрчлөлт оруулах тухай ажилласан. Мөн 2019 оны арванхоёрдугаар сарын 17-ны өдөр Генетик нөөцийн тухай хуулийн төслийг УИХ-д өргөн мэдүүлсэн. Генетик нөөцийн тухай хуулийг анх удаа шинэчлэн баталлаа. Энэ хууль  ургамал, ан, бичил биетэнд уламжлалт мэдлэг дээр суурилж болон  техник технологийг ололтыг ашиглан шинэ бүтээл гаргавал патент олгох, зохиогчийн эрхийг хуулиар хамгаалах тухай тусгасан. Мөн байнгын хорооны 2021 оны арваннэгдүгээр сарын 16-ны өдрийн  13 дугаар тогтоолоор Тусгай хамгаалалтын газар нутгийн тухай хуулийн  хэрэгжилтийн талаар хяналт шалгалт хийх ажлын хэсэг гарч ажилласан” гэв.