УИХ-ын ээлжит бус чуулган өнөөдөр эхэлж, энэ оны Төсвийн тухай хуульд нэмэлт өөрчлөлт оруулах тухай хуулийн төслийг хэлэлцэж эхэлнэ. Засгийн газар өнөөдөр мөн л ээлжит бусаар хуралдаж Төсвийн тодотголын төслийг хэлэлцэн УИх-д өргөн барьж байгаа юм.

Гэхдээ энэ нь шинэ мэдээлэл биш, бас зарим нэгний хэлээд байгаачлан Ерөнхийлөгчийн үүрэг даалгаврын дагуу ч ийм тодотголыг хийж байгаа юм биш билээ. Учир нь, энэ тухай аль шинэ жилийн өмнө ҮАБЗ-ийн гишүүд тохиролцсон байсан бөгөөд УИХ-ын дарга шинэ жилийн өмнө сэтгүүлчидтэй уулзахдаа л төсвийг тодотгож, тэтгэвэр тэтгэмжийг нэмэх тухай зангиагүй ярьсан билээ. Энэ цаг хугацааг цагаан сарын өмнө гэдгийг ч тэрбээр хэлж байлаа. Ингэхдээ Тасганы овоон дээр 32 тэрбумаар барихаар төсөвлөсөн Богд Зонхова, Булганд барих Айрагны өргөө, Сэлэнгэ аймгийн усан бассэйн зэрэг олны дургүйцлийг хүргэсэн төсвийн хөрөнгө оруулалтыг царцааж тэтгэвэр тэтгэмжийг нэмэх эх үүсвэрт шингээнэ гэдгийг манай сайт мэдээлж байсан билээ.

Харин 2022 онд дуусах төслүүдийн зардлыг тодотголоор танахгүй, царцаахгүй байхаар тодотголд тусгасан байна. Урсгал зардлын хувьд цар тахалтай нүүр тулан тэмцэж байгаа эрүүл мэнд, онцгой байдал, нийгмийн аюулгүй байдлыг хангах гэх мэт чиг үүргийг хэрэгжүүлж буй салбараас бусад салбарын дөрвөн тэрбум төгрөгөөс дээш өртөгтэй төсөл, арга хэмжээний санхүүжилтийг 10 хувийг царцаах замаар нийт 50 тэрбум төгрөгийн зардлыг бууруулахаар тооцжээ.

Б.Жаргал