Ердөө арав хүрэхгүй хоногийн өмнө завсарласан УИХ ээлжит бус чуулган зарлаж, өчигдөр нээлтээ хийсэн. Энэ чуулганаар Төсвийн тухай хуульд нэмэлт өөрчлөлт оруулах тухай Засгийн газрын өргөн барьсан хуулийн төслийг хэлэлцэж байгаа. Гол нь зарим шаардлагагүй хөрөнгө оруулалтуудыг царцааж, тэр мөнгийг тэтгэвэр тэтгэмжийг нэмэхэд зориулан төсөвт тодотгол хийж буй нь энэ билээ. Ингэснээр

-Бүрэн тэтгэврийн доод хэмжээг 350.000-аас 500.000 төгрөг

-Хувь тэнцүүлсэн тэтгэврийн доод хэмжээг 300.000-аас 400.000 төгрөг

-500.000 төгрөгөөс дээш тэтгэврийг 15 хувиар

-Халамжийн тэтгэврийг 188.000-аас 288.000 төгрөг болгон нэмэгдүүлэхээр УИХ-ын байнгын хороодоор хэлэлцэж эхэллээ.

Байнгын хороод энэ амралтын өдрүүдээр хуралдаж санал дүгнэлтээ гаргасны дараа ирэх даваа гарагт УИХ-ын нэгдсэн чуулганаар Төсвийн тодотголын хэлэлцүүлгүүд явагдана. Ээлжит бус чуулганы нээлтээр үг хэлсэн гишүүд ихэвчлэн тэтгэвэр тэтгэмжийг нэмэгдүүлэхийг зөв хэмээн дэмжиж байгаагаас харвал Төсвийн тодотголын сүүлийн хэлэлцүүлгүүдийг нэгтгээд ганцхан өдрийн дотор буюу даваа гарагт энэ оны Төсвийн тухай хуульд нэмэлт өөрчлөлт оруулах биз ээ. Энэ бүхнийг энд орхиод ээлжит бус чуулганаар сэдвээсээ хазайсан, сэдвийнхээ учир утгыг ойлгоогүй үг хэлж олны дургүйцлийг төрүүлсэн гурван гишүүний хоёр эшлэлийг уншигчдад цөөн үгээр хүргэе.

УИХ-ын гишүүн Н.Учрал: Дуртай нь дуртай зүйлээ ярьдаг боллоо

-Жагсагчдад мөнгө өгөөд эхлээд бид наадамгүй болсон, одоо бөх нь барилдаж чадахаа больсон, одоо ахмадаа дээдэлж хүндэлж чадахаа болих нь байна. Т.Доржханд гэдэг поп нөхөр С.Одонтуяа гишүүний толгойг эргүүлээд ул боов тараавал эрүүгийн хариуцлага хүлээлгэнэ ч гэх шиг юм яриад явж байна. АН-ын мөнхийн дарга С.Эрдэнэ гэдэг хүнээс Нийгмийн даатгалын мөнгийг олж ирмээр байна. Э.Одбаяр гээд хүү нь гудамжинд жагсаж байхын оронд аавынхаа гэрээс тэр мөнгө олж ир. Энэ нөхдөд хариуцлага тооцож ахмадын тэтгэврийг нэмэх хэрэгтэй. Тэгэхгүй бол дуртай болгон нь дуугарч байдаг боллоо.

Редакцын тайлбар: Уучлаарай, Н.Учрал гишүүн ээ. Монгол Улсын Үндсэн хуулиар Монгол улсын иргэн бүрт үзэл бодлоо илэрхийлэх эрх нь яг Таны адил тэгш нээлттэй байдаг юм.

УИХ-ын гишүүн Г.Мөнхцэцэг: Тэтгэвэр бол төрөөс ахмадууддаа үзүүлж байгаа дэм тус

-Тэтгэвэр гэдэг бол орлого биш, цалин бас биш. Улс орныхоо төлөө зүтгэсэн, гар хөлөө хөдөлгөсөн, ажилласан ахмадууддаа Монгол Улсын төр харж байгаа дэм гэж ойлгож явдаг. Тэтгэвэр гэдэг бол төрөөс ахмадууддаа үзүүлж байгаа дэм тус.

Редакцын тайлбар:Тэтгэвэр гэдэг бол төрөөс ахмадууд үзүүлдэг дэм тусламж огтоос биш бөгөөд харин ажиллаж хөдөлмөрлөсөн жилүүддээ цалингаасаа суутгуулсан шимтгэлийнхээ хэсгийг л төрөөс буцаан авч байгаа хэлбэр шүү. Яагаав, улстөрчдийн хамаарал бүхий банкийг эрсдэлтэй гэдгийг нь мэдсээр байж төр хадгалуулаад алдчихаг тэр мөнгө.

О.Балдан-Очир