УИХ-ын гишүүн Н.Алтанхуяг, Н.Ганибал нар Улсын Дээд шүүхийн Тамгын газрын дарга С.Амардэлгэр, СЕХ-ны дарга П.Дэлгэрнаран, УБЕГ-ын дарга Д.Дэлгэрсайхан, УБЕГ-ын Хяналт шалгалтын газрын дарга Б.Ганзориг, улсын хяналтын ахлах байцаагч Ж.Чиймаа, Д.Чинтулга, Э.Бат-Очир нарыг шалгуулахаар АТГ-т хандлаа.

УИХ-ын хоёр гишүүн “УБЕГ-ын Хяналт шалгалтын газрынэ хяналтын улсын байцаагч Д.Чинтулгын 2020 оны арванхоёрдугаар сарын 24-ний өдрийн 6030 тоот дүгнэлт, түүнийг үндэслэн 2020 оны арванхоёрдугаар сарын 25-ны өдөр улсын бүртгэлийн хуудсаар тамга, тэмдгийн хяналтын дугаар олгосон Хуулийн этгээдийн УБГ-ын улсын бүртгэгч Э.Бат-Очирын шийдвэр, энд нэр дурдагдсан байцаагч нарын шийдвэрийг хянаж үзээд хууль тогтоомжийг зөрчөөгүй байна гэж шийдвэрлэсэн Хяналт шалгалтын газрын дарга Б.Ганзоригийн 2021 оны нэгдүгээр сарын 12-ны өдрийн 8/190 тоот хариу хүргүүлэх албан бичиг, мөн УБЕГ-ын дарга Д.Дэлгэрсайханы 2021 оны дөрөвдүгээр сарын 29-ний өдөр Сонгуулийн ерөнхий хороо руу явуулсан 1/3017 тоот албан бичгүүд хууль, журмыг зөрчсөн гэмт хэргийн шинжтэй хууль бус үйлдэл байх тул эрүүгийн хариуцлага хүлээлгэх үндэслэлтэй байна” хэмээн АТГ-т хандаад байгаа юм.

Н.Алтанхуяг, Н.Ганибал нарын гишүүдийн гаргасан гомдолд дурдагдсан албан тоот, бичгүүд нь АН-ын тамгатай холбоотой асуудлыг шийдвэрлэсэн улсын байцаагчдын шийдвэр юм. Улсын байцаагч хууль бусаар ийм дүгнэлт гаргаснаар улбаалан АН хоёр тамга тэмдэгтэй болоод байгаа гэж тэд үзэж буй.

С.Сүлд