2021-2022 оны хоёрдугаар улирлын хичээлийг хоёрдугаар сарын 14-с эхлүүлэх Засгийн газрын шийдвэр гарсан. Үүнтэй холбоотойгоор хичээлийн хоцрогдол арилгах төлөвлөгөөг боловсруулсан тухай болон судалгааны үр дүнг танилцуулж хэвлэлийн хурал хийлээ. Энэ үеэр Боловсрол, Шинжлэх ухааны сайд Л.Энх-Амгалан судалгааны үр дүнг танилцууллаа. Тэрбээр “Цаашдаа бүх сургалтыг танхимаар хичээллүүлэхэд бид анхаарч ажиллах ёстой гэж харж байна. Судалгаагаар гарсан сэтгэл эмзэглүүлсэн зүйл бол хүүхдийн сургууль завсардалт сүүлийн хоёр жилд маш их ихэссэн байна. Өнөөдөр Монгол улсын хэмжээгээр 2000 орчим хүүхэд сургууль завсардах эрсдэл нүүрлэсэн байна. Сургууль завсардаж байгаа энэ хувь хэмжээг хоёр жилийн өмнөх хувь хэмжээтэй харьцуулахад 60 гаруй хувиар өссөн үзүүлэлттэй байна. Энэ тоо цаашдаа өсөх магадлалтай байгаа. Энэ бол хамгийн том эрсдэлийг агуулж байна. Тиймээс бид энэ нэг ч хүүхдийг сургууль завсардуулахгүй байх боломжоор хангаж ажиллаж байна” гэлээ.
