Монгол Улсын Ерөнхий сайд БНХАУ-д ажлын айлчлал хийгээд өчигдөр эх орондоо ирлээ. Айлчлалын хүрээнд Ерөнхий сайд Л.Оюун-Эрдэнэ БНХАУ-ын дарга Ши Жиньпинд бараалхаж, Төрийн зөвлөлийн Ерөнхий сайд Ли Көчянтай албан ёсны уулзалт хийсэн. Хоёр улсын Засгийн газрын 9 зүйл бүхий хамтарсан мэдэгдлээс харахад манай Ерөнхий  сайдын урд хөршид хийсэн айлчлал чамлахааргүй үр дүнтэй байсныг илтгэнэ. Ямар ч л байсан коксжих нүүрсээ дэлхийн зах зээлд борлуулах гол гарц болох төмөр замын хилийн шугам дайран өнгөрөх цэгийг харилцан тохиролцох тухай ноот бичгийг энэ айлчлалын үеэр хоёр улсын Засгийн газрын хүрээнд солилцлоо. 14 жил төмөр замаар дотоод улс төр хийцгээсэн манай улсын хувьд зам тавих царигаа нарийн, бүдүүн байна гэж маргаж байснаас бус хилийн шугам дайран өнгөрөх цэгээ урд хөрштэйгөө тохиролцох алхмыг хийж байгаагүй л юмдаг. Энэ цэгийг тохиролцох ноот бичгийг солилцоно гэдэг бол эхний цэгээ хатгалаа л гэсэн үг. Мэдээж албажуулах нарийн тохиролцоонууд айлчлалын дараа эхлүүлэх суурь нь ингэж тавигдлаа гэсэн үг л дээ. Гэх мэтээр Ерөнхий сайдын айлчлалын богцыг уудлавал гадаад бодлогод, эдийн засагт эерэг дүн авчрах олон яриа хэлэлцээ бий нь дамжиггүй. Ерөнхий сайдын урд хөршид хийсэн ажлын айлчлалын багт цар тахалтай холбоотойгоор цомхон бүрэлдэхүүн багтсан ч өөр өөрсдийн хамрах хүрээнд яриа хэлэлцээгээ чамбай хийж байгаа нь Бээжингээс ирүүлж байгаа мэдээллүүдээс харагдсан. Сангийн сайд Б.Жавхлан, Гадаад харилцааны сайд Б.Батцэцэг, хотын дарга Д.Сумъяабазар гээд Ерөнхий сайдын айлчлалын бүрэлдэхүүнд багтсан албаныхны хийж байгаа яриа хэлцлүүдээс харахад шүү дээ.

Тэднээс анхаарал татсан нь гаднын хэвлэлүүдээр гарсан Гадаад харилцааны сайдын тухай мэдээллүүд. Монгол Улсын Ерөнхий сайдын айлчлалын бүрэлдэхүүнд багтсан Гадаар харилцааны сайд Б.Батцэцэгийн тухай урд хөршийн хэвлэлүүд онцолж нийтэлжээ.

БНХАУ бол төрийн мэдээлэлдээ нэлээд цензуртэй ханддаг. Тиймдээ ч бусад улс орны Гадаад харилцааны сайд нартай хийсэн уулзалтын мэдээллүүдийг Гадаад харилцааны яамныхаа албан ёсны хуудсаар мэдээлдэг. Харин энэ удаа улс төрийн хамгийн өндөр мэдэлтэй Төрийн зөвлөлийн мэдээллийн хэрэгслүүдээрээ манай улсын Гадаад харилцааны сайд Б.Батцэцэгийн тухай онцлон мэдээлжээ. Төрийн зөвлөлийн хэвлэл мэдээллийн хэрэгслээр гарна гэдэг нь Гадаад харилцааны сайдын уулзалтыг ямар өндөр төвшинд үнэлж байгааг харуулж байгаа хэрэг билээ.

Төрийн төв хэвлэлүүдээс гадна цахим сайтуудаар мөн Монголын Гадаад харилцааны сайд Б.Батцэцэг үндэсний хувцас, соёлоо дэлхийд сурталчилдаг, англи оросоор ус цас шиг ярьдаг гэж магтахын сацуу 蒙古国美女外长 буюу “Үзэсгэлэнт Гадаад харилцааны сайд” гэсэн байв.

Б.Жаргал