Хөгжлийн банкнаас авсан чанаргүй зээлүүдийн ихэнх нь улстөрчид хийгээд түүний хамаарал бүхий этгээдүүд байгаа нь ил болж нийгмийн дургүйцлийг асар ихээр хүргээд байгаа. Хөгжлийн банкны зарласан чанаргүй зээлдэгчдийн хамгийн том нь “Кью Эс Си”-гийн авсан 71 сая 300 ам долларын буюу 213 тэрбум төгрөгийн, “Хөтөл” цементийн 61 сая ам долларын буюу 295 тэрбумын зээл байгаа юм.

Энэ хоёр зээл авсан аж ахуйн нэгжүүд нь нэг эзэнтэй буюу бидний нэрлэж заншсанаар Худалдаа Хөгжлийн банкны “сахал” Д.Эрдэнэбилэгийн хамаарал бүхий компаниуд авсан байдаг юм. Энэхүү “Кью Эс Си”-гийн зээлийг 2014 оны арванхоёрдугаар сарын 3-нд Хөгжлийн банкнаас олгосон байдаг юм.

Энэ үед Ерөнхий сайдаар Ч.Сайханбилэг, Хөгжлийн банкны ТУЗ-ийн даргаар Б.Шинэбаатар ажиллаж байв.

Монгол Улсын 28 дахь Ерөнхий сайд Ч.Сайханбилэгийн хувьд 2014 оны арваннэгдүгээр сарын 21-нд томилогдсон бөгөөд түүнийг Ерөнхий сайд болсноос хэдхэн хоногийн дараа Д.Эрдэнэбилэгийн хамаарал бүхий энэ компани зээл авч байжээ. Энэ зээлээр нь “Кью Эс Си”-гийнхэн төмөр замын төсөл санхүүжүүлсэн бөгөөд Хөгжлийн банктай шүүхээр маргалдаж байсан юм. Харин сар гаруйхны өмнө Улсын Дээд шүүхийн шийдвэр гарч энэ зээлийг нь “Кью Эс Си”-гийнхэн Хөгжлийн банкинд төлөх шүүхийн шийдвэрийг хэвээр үлдээсэн билээ.

Харин Д.Эрдэнэбилэгийн хамаарал бүхий дараагийн компани болох “Хөтөл”-д зээл олгох шийдвэр гарах үед Ерөнхий сайдаар Сү.Батболд, Сангийн сайдаар Д.Хаянхярваа, Хөгжлийн банкны гүйцэтгэх захирлаар Ким Жанг Жин, ТУЗ-ийн даргаар хожим тус банкны гүйцэтгэх захирал болсон Б.Батбаяр ажиллаж байсан байна.

Б.Жаргал