Хөгжлийн банкны талаарх асуудлаар АН мэдээлэл хийлээ. Мэдээллийн эхэнд УИХ-ын гишүүн Д.Ганбат үг хэллээ. Тэрбээр “Хөгжлийн банк 2011 онд байгуулагдсан. Өнөөдрийг хүртэл арав гаруй жил үйл ажиллагаа явуулж байна. Энэ хугацаанд хөгжлийн банк маш том луйврын систем болсон байна. Анх байгуулагдахдаа Монгол улсын хөгжүүлэх, том төслийг санхүүжүүлэх зорилготой орж ирсэн. Харин өнөөдөр мэдэгдэж байгаагаар 3,2 их наяд төгрөгийн зээлтэй, үүний 1,8 их наяд төгрөг буюу 55 хувь нь чанаргүй зээл гэсэн статустай байна. Манай улс Ази, зүүн хойд Азидаа хамгийн ядуу улс орны нэг болсон байна.  Гурван хүний нэг нь ядуу байна. Одоо энэ халамжийн тогтолцоо  үгүй болбол хоёр хүний нэг нь хүнд байдалд орно. Энэ хөгжлийн банкны луйврын системтэй тэмцэж байгаа сэтгүүлчдийг бид дэмжиж байна.

Мөн засгийн газар тэмцэх хэрэгтэй. 2016 оны сонгуулиар ард түмэн бидэнд  дүн тавьсан. Үүнд хөгжлийн банкны асуудал ч орсон. Сэтгүүлчид энэ бүгдийг ил гаргах, мэдээлэх үүрэгтэй, харин тэмцэж бол чадахгүй. Авилгатай тэмцэх газар, цагдаа, шүүх зэрэг нь тэмцэх хэрэгтэй. Гэтэл ажлын хэсгийн ахлагч нь энэ шалгаж байсан материалууд нь хэмээн хоёр боодол материал авчирч өгч байх жишээтэй. Бараг зургаан жил тэр материалыг дарсан байна. Энэ маягаар явж болохгүй.  Дуулиан шуугиан болоход хүмүүс зээлээ төлж байна. Энэ нь ерөөсөө 30,40 тэрбум төгрөг. Цаашдаа хөгжлийн банк илүү том луйврын систем болох магадлалтай. Үүнийг таслан зогсоох шаардлагатай. Миний бие хянан шалгах түр хороо байгуулах санал гаргаж байна” гэлээ.

Д.Батчулуун