Хөгжлийн банкны чанаргүй зээлдэгч нарын нэг нь Ерөнхийлөгч асан Х.Баттулгын зөвлөхөөр олон жил ажилласан Ц.Ууганбаярын “Нью Яармаг хаусинг прожект”. Энэ аж ахуйн нэгж нь Хөгжлийн банкинд 117.9 тэрбум төгрөгийн өртэй бөгөөд хамгийн хачирхалтай нь энэ зээлийг авахдаа барьцаалсан эд хөрөнгөө шүүхийн шийдвэрээр барьцаанаас чөлөөлүүлж авсан байдаг юм.

Нийт 21 ширхэг үл хөдлөх хөрөнгийг барьцаанаас чөлөөлөх тухай анхан шатны шүүхийн шийдвэрийг Улсын дээд шүүх хэвээр үлдээх тогтоолыг 2019 оны зургадугаар сарын 24-ний өдөр гаргасан бөгөөд энэ үед Монгол Улсын Ерөнхийлөгчөөр Х.Баттулга ажиллаж байлаа.

Энэ хэргийг Улсын дээд шүүхээр шийдвэрлэх хуралдааныг Улсын дээд шүүхийн танхимын тэргүүн Х.Сонинбаяр даргалж, шүүгч П.Золзаяа, Г.Цагаанцоож, Д.Цолмон, Х.Эрдэнэсувд нарын бүрэлдэхүүнтэй хийж байжээ.

Ийм шийдвэр гарснаас яг хоёр хоногийн дараа “Нью Яармаг хаусинг прожект”-ын барьцааны 20 объект, нэг газрыг чөлөөлөх анхан шатны шүүхийн шийдвэрийг хэвээр үлдээх энэ тогтоолыг гаргасан Улсын Дээд шүүхийн бүрэлдэхүүнд байгаа Х.Сонинбаяр, Д.Цолмон, П.Золзаяа, Г.Цагаанцоож нарыг Ерөнхийлөгч Х.Баттулгын зарлигаар бүрэн эрхийг нь түдгэлзүүлж байсан бөгөөд Салхитын мөнгөний ордын хэрэгт холбогдуулан үндэслэлгүйгээр хөрөнгөжсөн хэмээж байсан юм.

Удалгүй энэ үйл явдлаас зургаан сарын дараа, 2020 оны нэгдүгээр сард Х.Сонинбаяр, П.Золзаяа нарын бүрэн эрхийг мөн л Ерөнхийлөгч Х.Баттулгын зарлигаар сэргээж байжээ. Харин бүрэн эрхийг нь түдгэлзүүлсэн Д.Цолмон, Г.Цагаанцоож нарын хэргийг шүүхээр хэлэлцээд 2020 оны тавдугаар сард цагаатгах шийдвэр гарч байв. “Нью Яармаг хаусинг прожект”-ын барьцаа хөрөнгийг чөлөөлөх Дээд шүүхийн шийдвэр хийгээд шүүгч нарын бүрэн эрхийг түдгэлзүүлэх Ерөнхийлөгчийн зарлиг хоёр ердөө хоёрхон хоногийн зөрүүтэй гарч байсан нь анхаарал татдаг. Магадгүй зөвлөхийнхөө компанийн барьцаа хөрөнгийг чөлөөлүүлэхийн тулд Улсын Дээд шүүхийн эдгээр шүүгчдэд Ерөнхийлөгч Х.Баттулга шахалт үзүүлсэн, бүрэн эрхийг нь түдгэлзүүлнэ хэмээн “шуум” тараасан. Ийм шахалтад орсон Дээд шүүхийн шүүгч нар “Нью Яармаг хаусинг прожект”-ын талд шийдвэр гаргасан ч нэгэнт шүүгчдийн бүрэн эрхийг түтгэлзүүлнэ гэсэн “шуум” явчихсан учир бүрэн эрхийг нь түх түдгэлзүүлээд дахин сэргээсэн байх магадлалтай хэмээн харддаг билээ.

Б.Жаргал