Хөгжлийн банкны дуулиан шуугиан үргэлжилж байна. Өнөөдөр Хөгжлийн банкны гүйцэтгэх захирал асан Б.Батбаярыг цагдан хорих эсэхийг  шүүхээр шийдвэрлэлээ. Чингэлтэй дүүргийн Эрүүгийн хэргийн анхан шатны шүүхээс Б.Батбаярыг нэг сарын хугацаанд цагдан хорих шийдвэрийг саяхан гаргалаа. Түүнийг захирлаар ажиллаж байх үед 487 тэрбум төгрөгийн чанаргүй зээлийг гаргасан байдаг юм.

Харин одоо Хөгжлийн банкны бас нэгэн Гүйцэтгэх захирал Н.Мөнхбатыг цагдан хорих эсэхийг шийвэрлэх хурал болж байна. Н.Мөнхбатын хувьд гурван хэрэг үүсгэн шалгаж байсан бөгөөд хоёрыг нь цагаатган, нэгийг нь хөөн хэлэлцэх хугацаа дууссан гэсэн үндэслэлээр хэрэгсэхгүй болгож байлаа.

Ийн Хөгжлийн банкны зээл олгож байсан үе үеийн захирлуудыг цагдан хорьж шалгахаар болж байна. Харин энэ дуулианд сугарч үлдэх магадлалтай байгаа Хөгжлийн банкны нэг захирал асан байгаа нь одоогийн УИХ-ын гишүүн Г.Амартүвшин. Тэрбээр Хөгжлийн банкны захирлаар есөн сар ажиллахдаа 66 тэрбум төгрөгийн зээл гаргасан байдаг бөгөөд үүний тал хувь нь өөрийн дотнын найзууддаа танил талаараа олгосон байж магадгүй гэсэн хардлага байдаг билээ. Гэсэн ч УИХ-ын гишүүний бүрэн эрхийн хүрээнд тэрбээр энэ бүхнээс сугарч үлдэж мэдэхээр байна.

Б.Жаргал