Шүүхийн ерөнхий зөвлөлийн байранд "Нээлттэй шүүх" хэвлэлийн хурал болж байна. Хурлаар Монгол улсын шүүхийн 2021 оны шүүн таслах ажиллагааны нэгдсэн дү мэдээг танилцууллаа. Монгол улсын хэмжээнд өнгөрсөн онд хянан шийдвэрлэсэн эрүүгийн  хэрэг 10,4 хувиар, ял шийтгүүлэгчдийн тоо 15,9 хувиар тус тус буурсан байна. Шүүхийн гэмт хэрэг үйлдсэн гэм буруутай гэж үзэж 13093 хүнийг гэмт хэрэг үйлдсэн гэм буруутайд тооцож, 12163 хүн, хоёр хуулийн этгээдэд ял шийтгэл оногдуулж шийдвэрлэсэн байна. 1560 хүнд хорих ял оногдуулахгүйгээр тэнсэх арга хэмжээ авсан байна.  Анхан шатны шүүхээр хянан шийдвэрлэсэн нийт хэргээс дараах төрлийн гэмт хэрэг өссөн байна.

-          Хүчиндэх гэмт хэрэг 39 хэргээр буюу 12,7 хувиар,

-          Залилах гэмт хэрэг 22 хэргээр буюу  3.1 хувиар,

-          Авилгын гэмт хэрэг 39 хэргээр буюу 33,6 хувиар тус тус өссөн байна.

Харин зарим гэмт хэргийн тоо буурчээ. Тухайлбал,

-          Авто тээврийн хэрэгслийн хөдөлгөөний аюулгүй байдал, ашиглалтын журам зөрчих гэмт хэрэг 242 хэргээр буюу 23,5 хувиар,

-          Бусдын эрүүл мэндэд хөнгөн хохирол учруулах гэмт хэрэг 683 хэргээр буюу 12,0 хувиар  

-          Хулгайлах гэмт хэрэг 361 хэргээр буюу  22.4 хувиар

-          Дээрэмдэх гэмт хэрэг 78 хэргээр буюу 29,0 хувиар тус тус буурсан үзүүлэлттэй байна.

Шүүх  торгох ялыг түлхүү оноожээ

Өнгөрсөн онд улсын хэмжээнд торгох ялаар нийт 6179 хүн, хоёр хуулийн этгээд, нийтэд тустай ажил хийлгэх ялаар 1518 хүн, хорих ялаар 1560 хүн,  зорчих эрхийг хязгаарлах ялаар 1049 хүн тус тус шийтгүүлсэн байна.  Өнгөрсөн оноос торгох ялаар ял шийтгүүлсэн хүний тоо 19,3 хувиар, нийтэд тустай ажил хийлгэх ялаар ял шийтгүүлсэн хүний тоо 26,5 хувиар, хорих ял шийтгүүлсэн хүний тоо 31,4 хувиар тус тус буурсан байна. Шүүхээс 6179 хүн, хоёр хуулийн этгээдийг нийт есөн тэрбум 568 сая 941 мянга 330 төгрөгийн торгох ялаар шийтгэсэн нь өмнөх оны мөн үеийн үзүүлэлтээс 4,2 хувиар өссөн байна. 

Цагдан хорих зөвшөөрлийн тоо буурчээ

Улсын хэмжээнд 2021 онд цагдан хорих зөвшөөрөл олгосон хүний тоог өмнөх онтой харьцуулбал, 618 хүнээр буюу 20,8 хувиар, цагдан хорихоос татгалзсан хүний тоо зургаан хүнээр буюу 1,9 хувиар тус тус буурсан байна. Сэжигтнийг баривчлах зөвшөөрөл олгосон хүний тоо есөн хүнээр буюу 6,1 хувиар буурсан байна. 

Хорих ял эдлэх дэглэмийг бууруулжээ

Улсын хэмжээнд 2021 оны байдлаар нийт 144 хорих ял эдлэх дэглэмийг бууруулж, хаалттайгаас нээлттэй дэглэмд шилжүүлсэн нь өнгөрсөн онтой харьцуулбал 15 хувь хүн буюу 11,6 хувиар өссөн байна.