“Хөвсгөл нуурыг хамгаалах үндэсний чуулга”-ны нээлт өнөөдөр Төрийн ордны ёслол хүндэтгэлийн танхимд эхэллээ. Чуулганыг нээж Монгол Улсын Ерөнхийлөгч У.Хүрэлсүх үг хэллээ.

Тэрбээр “Хөвсгөл нуур нь манай улсын цэнгэг усны 77,6 хувь, дэлхийн цэнгэг усны 0,4 хувийг бүрдүүлдэгээс гадна дэлхийн хамгийн гүн бөгөөд цэнгэг устай хоёр сая жилийн настай, нэн эртний нууруудын нэг юм. Гэтэл сүүлийн жилүүдэд огцом нэмэгдэж байгаа хүний хэрэгцээ, аялал жуулчлал, нууранд живсэн машин техник, хог хаягдал, нуурыг түшиглэн үйл ажиллагаа явуулж буй зарим нэг хариуцлагагүй аж ахуйн нэгж, иргэдийн зүй зохисгүй үйл ажиллагааны улмаас Хөвсгөл нуурын экосистем алдагдах аюул нүүрлэж, нуурын ус ихээр бохирдож, байгаль орчинд сөрөг нөлөө үзүүлэх боллоо.

Тиймээс Хөвсгөл нуураа хамгаалах, зүй зохистойгоор ашиглах, хөгжүүлэх зорилгоор энэхүү үндэсний чуулганыг Монгол Улсын Ерөнхийлөгч, төрийн тэргүүн санаачлан зохион байгуулж байна. 1950-аад оноос хойш нууранд живсэн 50 гаруй тээврийн хэрэгсэл нуурын хорт хавдар мэт одоог хүртэл байсаар байна. Эдгээр живсэн машинуудын тос тосолгооны материал алдагдвал нуурын экологийн тэнцвэрт байдал алдагдах, нуур орчмын биологийн олон янз байдал алдагдах зэрэг асар их хохирол үүсэх эрсдэлтэй. Иймээс өмнөх онд нуурын гүнд живсэн “Сүхбаатар” хөлөг онгоцыг татан гаргаж, нэгэн том эрсдэлийг аюулгүй болгосон. Энэ үйл явдал далай ээжийг бохирдолоос хамгаалсан бодит үйл явдал болсон гэж үзэж байна. Цаг уурын хүнд нөхцөлд эр зориг, тэсвэр тэвчээр гарган төрийн тэргүүнийхээ өгсөн үүрэг даалгаварыг нэр төртэй биелүүлсэн, амжилттай гүйцэтгэсэн бүх хүмүүс, бие бүрэлдэхүүн, албан хаагчдадаа ард түмний нэрийн өмнөөх гүн талархал илэрхийлье” гэв.

Т.Мөнхжаргал