Дэлхий нийтийн анхаарал ОХУ-Украиныг чиглэж байгаа энэ үед аль улс, ямар байр суурь илэрхийлэх нь хүн бүрийн сонирхох сэдэв болоод байна. Барууны голдуу орнууд ОХУ-д хориг арга хэмжээ авч байгаагаа өчигдөр илэрхийлж байсан бол өнөөдөр Азийн орнуудын төлөөлөл энэ хориг арга хэмжээг дэмжиж өөрсдийн байр сууриа илэрхийлж байна. Тухайлбал, Япон, Тайвань, Сингапур Орост тавих хоригт нэгдэж байгаа Ази тивийн улсууд болоод байна. Харин манай улсын урд хөрш БНХАУ-ын Гадаад хэргийн сайд Ван И-гийн хоёр үзүүртэй зүү мэт бүрхэг үгийг эс тооцвол ОХУ-Украины дунд үүсээд байгаа энэ асуудлаар ямар нэгэн байр сууриа албан ёсоор илэрхийлээгүй байгаа юм. Дэлхийн халуун цэг болсон зүүн Европын эл асуудлаар улс орнууд хийгээд томоохон улстөрчид ер нь маш хянуур, болгоомжтойгоор байр сууриа илэрхийлж байгаа. Гэтэл манай улсын Батлан хамгаалахын сайд Г.Сайханбаяр өөрийн албан ёсны сошиал хуудсаар өнөөдөр маш ноцтой зүйлийг жиргэсэн бөгөөд удалгүй түүнийгээ устгасан юм. Тэрбээр Эх орноо хамгаалагчдын өдөр хэмээсэн постер зураг бүхий танилцуулгын хамт Жил бүрийн хоёрдугаар сарын 23-ны өдрийг Орос улсад “эх орноо хамгаалагчдын өдөр” буюу Оросын цэргийн баярын өдөр болгон тэмдэглэдэг юм хэмээн өөрийн твиттэр хаягаар жиргээд байв.

Монгол Улсын батлан хамгаалахын сайдын оруулсан зурагт хуудаст “Жил бүрийн хоёрдугаар сарын 23-ны өдрийг Орос улсад “эх орноо хамгаалагчдын өдөр” буюу Оросын цэргийн баярын өдөр болгон тэмдэглэдэг юм. 1922 оны нэгдүгээр сарын 27-ны өдрийн Зөвлөлт Орос Улсын  Бүх Оросын Хэрэгжүүлэгч төв хорооны тогтоолоор хоёрдугаар сарын 23-ны өдрийг Улаан армийн үүсгэн байгуулагдсан өдөр 1922-1946 онд “Улаан армийн өдөр” 1946 оноос “Зөвлөлтийн армийн өдөр” 1949-1991 онд “Зөвлөлтийн арми болон тэнгисийн цэргийн флотын өдөр” гэж тэмдэглэж ирсэн байна. 1991 оноос “Эх орноо хамгаалагчдын өдөр” хэмээн тэмдэглэдэг болжээ” хэмээсэн байлаа.

Дэлхий нийтээр улс орнуудын удирдагчид, улстөрчид ОХУ болон Украины талаар юу хэлэх нь вэ гэдгийг цэгнэж байгаа энэ үед Монгол Улсын Батлан хамгаалахын сайд өөрийн албан тушаалаа бичиж баталгаажуулсан албан ёсны хуудсаараа дайны бэлэн байдалд байгаа хоёр улсын нэгийнх нь армийн талаар ингэж жиргэсэн нь Оросын талыг дэмжиж буй байр суурь мэтээр ойлгогдохоор байсан юм. Иргэн Г.Сайханбаяр өөрийн сошиал хуудсаар юу бичих нь чухал биш ч, Монгол Улсын Батлан хамгаалахын сайд хэмээн баталгаажуулсан хаягаас бичиж буй бүхэн Монгол Улсын Батлан хамгаалахын сайдын байр суурь болон бусдад хүрдэг билээ. Дайны бэлэн байдалд байгаа улсуудын армийн талаар Батлан хамгаалахын сайдын ам бөх байх ёстой.

С.Сүлд