ОХУ Украин руу цэргийн түрэмгийлэл явуулснаас хойш дэлхийн улс орнууд, нэгдлүүд тэдэнд бүхий л хориг тавьж байгаа. Тухайлбал, Европын холбоо ОХУ-ын нисэх онгоц, хэвлэл мэдээллийн байгууллагуудад хориг тавьснаас гадна ОХУ-ын парламентийн доод танхимын гишүүдэд визны хориг тавьж хөрөнгийг царцаав, Дэлхийн банк хоорондын санхүүгийн харилцаа холбооны нийгэмлэг буюу SWIFT-ийн зүгээс Европын холбооны улсуудын шийдвэрийг хэрэгжүүлэхэд бэлэн байгаа ба рублийн ханшийг олон улсын санхүүгээр дэмжих ОХУ-ын төв банкны боломжийг хязгаарлаж, бусад банкуудыг Swift-ээс хасах шийдвэрт хүрчээ. Япон улсын зүгээс ОХУ-д бүс нутгийн экспорт, импортын хориг тавьснаас гадна засгийн газрын бондыг шинээр гаргах, арилжаалахыг хориглов. Герман улсаас ОХУ-руу чиглэсэн байгалийн хийн урсгалын хоёр дахин нэмэгдүүлэх зорилготой Балтийн тэнгисийн хоолойн төслийг зогсоов. Канад улс Луганск, Донекс улсуудад эдийн засгийн хориг тавьж, Их Британи улс ОХУ-ын гурван тэрбумтаныг өөрсдийн улсдаа зорчих эрхийг хориглож, таван банкны хөрөнгийг битүүмжилсэн. Үүнээс гадна спортын талбарт ОХУ-ын тамирчдад дараах хориг арга хэмжээг авсаар байна. FIFA, UEFA-гийн тэмцээнүүдэд ОХУ-ын үндэсний баг тамирчдын оролцуулахгүй байх хориг тавьж, UEFA ОХУ-ын “Газпром” компанитай байгуулсан гэрээгээ цуцлав. ОХУ-д болох байсан тэмцээн уралдаанууд цуцлагдаж, Оросын баг тамирчид тэмцээнээ цааш үргэлжлүүлэх боломжгүй боллоо. Олон улсын Жудогийн холбоо ОХУ-ын Ерөнхийлөгч Владимир Путинг тус холбооны хүндэт Ерөнхийлөгчөөс огцруулснаа мэдэгдсэн бол Олон улсын Таеквандогийн холбоо түүний хар бүсийн зэргийг хурааж авахаар шийдвэрлэлээ. Ерөнхийдөө дэлхий нийтээр Путины түрэмгийллийн эсрэг хоригт нэгдээд байгаа гэхэд нэг их үнэнээс зөрөхгүй.

Гэтэл өчигдөр буюу хоёрдугаар сарын 28-ны өдөр Монгол Улсын Шадар сайд С.Амарсайхан, ОХУ-ын “Газпром” НХН-ийн Удирдах зөвлөлийн дарга А.Б.Миллер нар ОХУ-аас Монгол Улсын нутаг дэвсгэрээр дамжуулан БНХАУ руу тавих “Байгалийн хийн хоолойн төсөл”-ийн хүрээнд 2022-2023 онд хийх инженер геодези, хайгуул судалгааны ажлын гэрээнд гарын үсэг зурлаа. Гэрээнд тусгаснаар Инженерийн хайгуул судалгааны ажилд оролцох ОХУ-ын туслан гүйцэтгэгч байгууллагуудад хөдөлмөр эрхлэх зөвшөөрөл олгох, Ажлын байрны төлбөр хураамжаас чөлөөлөх зэрэг ажлыг ирэх дөрөвдүгээр сард багтаан хийхээр төлөвлөсөн бол Төслийн хэрэгжилтийг төрөөс дэмжих цогц арга хэмжээний тухай хууль тогтоомжийн төсөл боловсруулж, батлуулах ажлыг 2023 оны эхэнд дуусгахаар төлөвлөжээ. Энэ мэдээллийг Монголын бараг бүх хэвлэлээр мэдээлснээс гадна “Риа новости” агентлаг, Блүүмберг дэлхий нийтэд мэдээллээ.

Энэ нь олон жил яригдаж байгаа төсөл боловч яг ийм эгзэгтэй үед Монгол Улсын Засгийн газар олон улсын хоригт ороод байгаах ОХУ-ын “Газпром”-той гэрээ байгуулж байгаа нь эс үйлдлээрээ тус улсын Украинд явуулж байгаа түрэмгийллийг дэмжсэн мэтээр харагдаж байна. Дарангуйллын эсрэг дэлхий нэгдэж, бид түүнийг нь сөрж байгаа мэт харагдуулав. Тэд дарангуйллас зугтааж, бид харин налав.

Т.Мөнхжаргал