Ардчилсан намаас ээлжит бус XIII их хурал болон болон цаг үеийн асуудлаар мэдээлэл хийлээ.

Тус намын ерөнхий нарийн бичгийн дарга Ч.Өнөрбаяр: Монгол Улс олон улсын асуудалд бодлоготой улс. 2010 онд Монгол Улсын үндэсний аюулгүй байдлын үзэл баримтлалыг шинэчилсэн. Энэ үзэл баримтлалд нийцүүлээд Монгол Улсын гадаад бодлогын үзэл баримтлалыг баталсан.

Үнэхээр Монгол Улс тусгаар улс юм бол Украины асуудлаар байр сууриа зарлах ёстой. Бодлого, байр суурьгүй байна гэдэг нь толгойгүй хүн шиг харагдаж байна. Дарга нар гадагшаа айлчилна, Монгол Улс дэлхийтэй харилцана. Энэ үед Монгол Улсын байр суурийг асууна шүү дээ. Тийм учраас Үндэсний аюулгүй байдлын зөвлөл ялангуяа Ерөнхийлөгч энэ асуудал дээр Аюулгүйн зөвлөлийг өргөтгөж хуралдуулж, Монгол Улсын байр суурийг илэрхийлэх ёстой гэж бодож байна. Монгол Улсын тусгаар тогтнол, бүрэн эрхт байдлыг хоёр хөрш маань бүрэн хүлээн зөвшөөрдөг. Бид НҮБ-ын бүрэн эрхт гишүүн улс. Хоёр хөрштэйгөө болон бусад улс орнуудтай газар нутгийн маргаангүй. 1992 онд Монголын ард түмний сонгосон хөгжлийн зам ардчилал, эрх чөлөө. Хүчирхийлэл, цэрэг зэвсгээр асуудлыг шийддэг байдлыг дэмждэггүй улс шүү дээ. Энэ бодлогоо цаашид тууштай барьж явах ёстой гэдэг байр суурийг Ардчилсан намаас гаргасан мэдэгдэлд илэрхийлсэн.