Хэлэлцүүлгийн үеэр УИХ-ын гишүүн Д.Ганбат үг хэллээ. Тэрбээр “ОХУ, Украины асуудал өнөөдөр найм дах хоногтоо явж байна. Тухайн үед нь Ардчилсан нам мэдээлэл хийсэн. ОХУ-ны хууль ёсны тэргүүн рүү дайрсан. ОХУ-ын хийж байгаа үйл ажиллагаанд мэдээлэлгүй хандсан. ОХУ-ыг бүх хүч хэрэгслээ ашиглан гээд манай АН-ын хувьд үнэхээр хэрэглэж боломгүй дипломат бус үгнүүдийг ашигласан.

Гэхдээ агуулгын хувьд зөв байсан. Бид бүхэн тусгаар тогтносон Монгол улсыг, Засгийн газар, төр засгийг мэдэгдэл хийх болов уу хэмээн харсан. Гэтэл мэдэгдэл хийсэнгүй. Бид үзэл бодлоо илэрхийлэх бүрэн боломжтой улс. Тиймээс хэсэг залуучууд дайныг эсэргүүцэн жагссан. Үзэл бодлоо илэрхийлэх эрхийг хангах нь засгийн газар, цагдаа, тагнуулын байгууллагын үүрэг юм. Хувь хүний үзэл бодлоо илэрхийлээд, дайныг дэмжиж байна гэж арай болохгүй. Зарим шалзан молзон толгойтой нөхдүүд. Үүнийг Монгол улсын хуулиар хориглосон зүйл. Гэхдээ үзэл бодлоо илэрхийлж болно. Украинд хүмүүнлэгийн гамшиг болж байна. 141 орон дайны эсрэг санал санаачлага гаргаж, үүнийг баталгаажуулсан. Үүний эсрэг таван улс байсан. Түтгэлзсэн 35 орон байснаас нэг нь манай улс.

Хэдийгээр дайныг зогсоох шаардлагад нийцээгүй ч түтгэлзсэн байна. Ядаж ийм байр суурь илэрхийлж байгаа нь зөв зүйтэй гэж үзэж байна. Би Украин улсын Киев хотод таван жил сурч байсан. Украин улсаас манай улсад суудаг элчин сайд байдаггүй юм байна. Дайны хоёр дахь хэлэлцээрээр хүмүүнлэгийн коридор байгуулагдсан байна. Тиймээс энэ хүмүүнлэгийн аянд улаан загалмайн байгууллага, Ардчилсан эмэгтэйчүүдийн байгууллага, Олон нийтийн байгууллага нэгдэж, тусламжийн гараа сунгах хэрэгтэй. Үүнд би санаачилга гаргаад өөрийн нэг сарын цалинг хандивлаж байна. Бүх Монголчуудыг үүнд уриалж байна” гэв.

Д.Батчулуун