Өнөөдөр Монгол Улсын их хурлын 2022 оны хаврын ээлжит чуулган нээлтээ хийлээ. Чуулганы хуралдаанд 61 гишүүд оролцож 80,3 хувийн ирцтэйгээр эхэлсэн юм. Ийнхүү уншигч та бүхэндээ хаврын чуулган тойрсон халуухан сэдвүүдийн “сонинсайхан”-г хүргэж байна.

Үндэсний аюулгүй байдлын зөвлөл хаалттай мэдээллэв

Энэ өдөр Үндэсний аюулгүй байдлын зөвлөл олон улсын нөхцөл байдал, гадаад дотоод аюулгүй байдалтай холбоотой асуудлаар “хаалттай” хуралдаж, УИХ гишүүдэд мэдээлэл өглөө.

Дайныг эсэргүүцэгч Г.Дамдинням гишүүн Монгол төрийн ордноос байр сууриа илэрхийлэв

Энэ удаагийн чуулганы нээлтэд хэд хэдэн онцлох агшин фото зурганд үлдсэний нэг нь УИХ гишүүн Г.Дамдиннямын зураг байлаа. Тэрбээр ОХУ, Украины дайныг эсэргүүцэж байгаагаа илэрхийлж “No war, Yes peace” гэсэн бичиг ширээн дээрээ тавьсан харагдана.

Ардчилсан намын тамганы маргаан цэгцрэв үү?

УИХ гишүүн асан С.Эрдэнэ, УИХ дахь АН-ын бүлгийн дарга Д.Ганбат нар мэдээлэл хийлээ. Энэ үеэр УИХ гишүүн Ц.Туваан, Ж.Батсуурь, Улсын дээд шүүхийн шүүгч Д.Ганзориг нарыг шалгуулахаар Үндсэн хуулийн цэцэд өгсөн талаар УИХ гишүүн асан С.Эрдэнэ хэлсэн. Тэрбээр “Өнгөрсөн хоёрдугаар сарын 16-нд Нийслэлийн хяналтын шатны захиргааны шүүх эцсийн шийдвэрээ гаргасан. Ц.Туваан О.Цогтгэрэл нарт байсан тамгыг хүчингүйд тооцож, надад байсан тамгыг хүчин төгөлдөр гэж үзээд давж заалдах эрхгүйгээр эцсийн байдлаар шийдвэрлэсэн. Тиймээс тамганы маргаан одоо дууссан" гэв.

С.Эрдэнэ “Монгол Улсын эдийн засгийн хөгжих боломжыг харь гүрэнд бэлэглэсэн хүн "Женко" хочит Х.Баттулга”

УИХ гишүүн асан С.Эрдэнэ энэ үеэр Ерөнхийлөгч асан Х.Баттулгыг Ардчилсан намын толгойд залахгүй гэдгээ мэдэгдлээ. Тэрбээр “Энэ хүн бол эрүүгийн гэмт хэрэгтэн, Монгол Улсын эдийн засгийн хөгжих бүх боломжыг харь гүрэнд, шууд хэлбэл ОХУ-д бэлэглэсэн хүн бол "Женко" хочит Х.Баттулга. Ийм хүнийг Ардчилсан өөрсдийн толгой дээрээ зална гэж байхгүй” гэж хэллээ.

УИХ гишүүн Т.Доржханд “УИХ гишүүдийн тоог нэмье”

Тэрбээр УИХ гишүүдийн тоо хүн амын тоотой харьцуулахад хангалтгүй байгаа талаар өнөөдөр байр сууриа илэрхийллээ. Энэ мэдээлэлдээ "Сонгуулийн тогтолцоог өөрчилье, гишүүдийн тоог өсгөе” гэсэн асуудлыг хөндөж ингэж хэллээ. Т.Доржханд “76 гишүүнтэй байх хуулийг 1992 онд батлагдсан. Тухайн үед 2,1 сая хүн амтай байсан бол өнөөдөр 3,5 сая хүн амтай болсон. Гишүүд иргэдээ төлөөлдөг. Энэ нь нэг хүний засаглалтай байх юм уу, олон хүний засаглалтай байх юм уу гэдэг асуудал” гэв.

Ардчилсан намын хоёр тамга эрх баригчдын даалгавар гэв үү?

УИХ гишүүдийн мэдээлэл Ш.Адьшаа гишүүний үгээр үргэлжиллээ. Тэрбээр “Ардчилсан намыг хоёр тамгатай болгосон буруутан нь эрх баригчдын даалгавараар хийгдсэн” гэсэн хувийн байр сууриа илэрхийлээд авлаа.

Дэнчингийн 500 сая төгрөгөө төлсөн УИХ гишүүн Ж.Батсуурь

Ардчилсан намын дотоод сонгуулийн хороо намын даргын  сунгааг зарласан. Харин нэр дэвшигч Х.Баттулгын менежер нэр дэвшигч Ж.Батсуурийг дэнчингийн мөнгөө төлөөгүй хэмээн мэдээллээд байсан юм. Өнөөдрийн чуулганы нээлтийн үеэр сэтгүүлчид УИХ гишүүн Ж.Батсууриас тодруулахад “Ардчилсан нам өөрөө асар том нам. Бүх зүйлд итгэл үнэмшилтэй явдаг. Тийм учраас дэнчингийн мөнгө болох 500 сая төгрөгийг хугацаанд нь төлсөн” гэв.

Хаврын чуулганы нээлт ийнхүү халуухан уур амьсгалаар эхэллээ. Харин сайд нар энэ үеэр ингэж мэдээллэв

Эрчим хүчний сайд Н.Тавинбэх “ОХУ-аас Монгол Улсад экспортоор нийлүүлдэг эрчим хүчинд хязгаарлалт тавих, хэмжээг бууруулах байдлаар ямар нэг гэрээнд өөрчлөлт оруулах талаар яриагүй. Монгол Улсын авч байгаа хүчин чадлын хэмжээгээр 21 хувь боловч ОХУ-г бодвол бага хэмжээтэй учир нөлөөлөл өндөр биш. ОХУ-аас авдаг импортын эрчим хүчний төлбөрийг америк доллараар төлдөг. Тиймээс рублын ханшын хэлбэлзлээс шалтгаалсан ямар нэг хүндрэл гарахгүй” гэв.

Эрүүл мэндийн сайд С.Энхболд КОВИД-19-өөс урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн биелэлтийг сар тутамд нээлттэйгээр хэлэлцэж, хяналт тавих үүрэг бүхий Түр хорооны хуралдаанд оролцох үедээ “Томуу, томуу төст өвчин улиралын чанартай, 5-6 хоног үргэлжилдэг. Тиймээс нэмэлт эмнэлэг шаардлагагүй. Харин хүний нөөцийг чадавхжуулах шаардлагатай байна. Ахмадын эмнэлэг болон бусад эмнэлэгт нэмэлт ор дэлгэх ажил хийж байгаа тиймээс коридорт өвчтөн авдаг асуудал байхгүй болно” гэсэн юм.

Т.Мөнхжаргал