Ерөнхий сайд Л.Оюун-Эрдэнэ Баян-Өлгий аймагт ажиллаж байна. Монгол Улсын Ерөнхий сайд Залуусын зөвлөлийг тэргүүлдэг. Баян-Өлгийн хүн амын тоо 113 мянга бөгөөд үүний 40 хувь залуучууд ажээ.
Энэ хүрээнд аймаг бүрийн залуустай уулзахаар төлөвлөсөн нь ийн Баян-Өлгий аймгаас эхэлж байна. Залуустай хийсэн уулзалтаараа Ерөнхий сайд Шинэ сэргэлтийн бодлогыг танилцуулж, иргэн бүр энэ бодлогод оролцсоноор эдийн засгийг ойрын хэдхэн жилд 150 их наяд төгрөг болтол тэлэх боломжтой гэдгийг хэлсэн. Залуустай хийх уулзалтаа казах түмний баяр хаврын баярын өмнөх өдөр Баян-Өлгий аймгаас эхлүүлсэн Ерөнхий сайд "Алсын хараа" сэдвээр залуустай ярилцсан юм. Ерөнхий сайд асан С.Батболдтой 2010 онд Баян-Өлгийд ирж залуустай уулзаж байсан тэрбээр 12 жилийн дараа Ерөнхий сайд болон дахин ирж буй нь энэ ажээ. Тэрбээр, "Улс бүхэн алсын хараатай байх ёстой. Сонгуулийн дөрвөн жилээр алсын харааг тодорхойлохгүй.
Бид долоон тэрбумуулаа дэлхийд амьдарч байгаа. Улс бүхэн, залуус бүхэн өөр өөрийнхөөрөө хөгжлийг тодорхойлдог, өөр өөрийнхөөрөа алсын хараагаа тодорхойлдог хэмээсэн юм. Баян-Өлгий аймгийн залуустай хийх уулзалтад сум бүрийн төлөөлөл ирсэн бөгөөд Ерөнхий сайд Монгол улсын өнцөг булан бүрт байгаа залуусын алсын хараа нийлээд Монгол Улсын алсын харааг тодорхойлно хэмээсэн. Баян-Өлгийн залуусын итгэл тэмүүллийг мэдрэх гэж уулзаж байгаа, хүн амын 70 хувийг бүрдүүлдэг залуусын санал бүр үнэ цэнтэй хэмээсэн билээ. Тэрбээр, "Хаана хүрэхээ мэдэхгүй бол ямар ч замаар аялаад хэрэггүй. Амьдрал бол зам. Ямар замаар аялах алсын хараагаа тодорхойлох хэрэгтэй" гээд Мартин Лютер Кингийн хэлсэн "Үхлээс дээгүүрт тавигдах үнэ цэн байхгүй бол та амьдралаа эхлээгүйд тооц" гэсэн үгийг эшлэсэн юм. Гурван арван жилээр стратегийг тодорхойлсон Шинэ сэргэлтийн бодлогын эхний арван жилийн эхний онд Монголын хөгжилд саад болж байгаа бүхнийг эерэг арга замаар шийднэ хэмээв.
Тухайлбал, далайд гарцгүй нь Монголын хамгийн том сул тал. Үүнийг нөхөхийн тулд боомтын шинэчлэл хамгийн нэгдүгээрт гэдгийг Ерөнхий сайд онцолсон. Энэ хүрээнд Баян-Өлгийн Цагааннуурын боомтыг шинэчилж, чөлөөт бүсийг идэвхжүүлэх юм. Боомтын хүчин чадлаараа манай улс 160 улсаас 130-д эрэмбэлэгддэг. Илүү хурдтай хөгжихийн тулд дэд бүтцээ улам сайжруулна. Эрчим хүч ОХУ-аас авдаг. Үүнийг Монголдоо авч үлдэхийн тулд Эрдэнэбүрэнгийн усан цахилгаан сианцыг ашиглалтад оруулах хэрэгтэй гэлээ. Залуусын уулзалт дээр Ерөнхий сайд нэгэн шийдвэр танилцуулсан нь Асгатыг ирэх долоо хоногт эдийн засгийн эргэлтэд оруулах тухай байлаа. Шинэ сэргэлтийн бодлого Баян-Өлгийд ингэж эхлэх ажээ. Орон нутгийг хөгжүүлэх ёстой. Энэ бодлого хэрэгжсэнээр хот руу тэмүүлэх тусам үнэтэй, орон нутагт ажиллах тусам дэмжлэгтэй байна гэдгийг онцлов. Шинэ сэргэлтийн бодлого хэрэгжсэнээр одоогийн 50 их наядын эдийн засаг 150 их наяд болно. Энд оролцох нь иргэний журамт үүрэг, алсын хараа байх болно гэж Ерөнхий сайд хэлсэн юм.
