Эрүүл мэндийн сайд, Анагаах ухааны доктор Н.Удвал Эрүүл энхийн оюуны ундарга, эрдмийн их өргөө болсон төрөлх сургуулийнхаа үүсэн байгуулагдсаны 70 жилийн ойг тохиолдуулан тус сургуулийн тулгын чулууг тавилцсан ахмад буурлууд, хөгжил дэвшилд нь үнэтэй хувь нэмэр оруулсан үе үеийн удирдлагууд, эрдэмтэн профессор, багш, сурган хүмүүжүүлэгч, ажилтан ажилчид, оюутан залуус, үе үеийн төгсөгчдөд энэхүү түүхт ойн баярын мэндийг дэвшүүлж сурган хүмүүжүүлэх, эрдэм судлах, ард түмнийхээ эрүүл энхийн манаанд зогсох их үйлсэд нь өндөр амжилт хүсэн аз жаргал, эрүүл энх, сайн сайхан бүхнийг хүсэн ерөөв.

Эрүүл мэндийн сайд, Анагаах ухааны доктор Н.Удвал Эрүүл энхийн оюуны ундарга, эрдмийн их өргөө болсон төрөлх сургуулийнхаа үүсэн байгуулагдсаны 70 жилийн ойг тохиолдуулан тус сургуулийн тулгын чулууг тавилцсан ахмад буурлууд, хөгжил дэвшилд нь үнэтэй хувь нэмэр оруулсан үе үеийн удирдлагууд, эрдэмтэн профессор, багш, сурган хүмүүжүүлэгч, ажилтан ажилчид, оюутан залуус, үе үеийн төгсөгчдөд энэхүү түүхт ойн баярын мэндийг дэвшүүлж сурган хүмүүжүүлэх, эрдэм судлах, ард түмнийхээ эрүүл энхийн манаанд зогсох их үйлсэд нь өндөр амжилт хүсэн аз жаргал, эрүүл энх, сайн сайхан бүхнийг хүсэн ерөөв.
Сайд хэлэхдээ, Монгол Улсад анагаах ухааныг хөгжүүлэхэд, эрүүл мэндийн салбарын морь унасан, модон чагнууртай эмчээс эхлээд орчин үеийн шинжлэх ухааны хөгжил дэвшилтэй хөл нийлүүлсэн их айл болон хөгжихөд Эрүүл мэндийн шинжлэх ухааны их сургууль болоод багийн эмнэлгээс эхлэн улсын үйлчилгээний төрөлжсөн нарийн мэргэжлийн эмнэлгүүд, эрдэм шинжилгээний байгууллагуудад ажилладаг тус сургуулийн үе үеийн төгсөгчдийн оруулсан хувь нэмэр үнэлж баршгүй их болохыг онцлон тэмдэглэхэд таатай байна гэв. Түүнчлэн тэрбээр, Эрүүл мэндийн шинжлэх ухааны их сургуулийн өнөөдрийн хүрсэн хөгжил дэвшил нь үе үеийн захирал, удирдлагуудын манлайлал, удирдан зохион байгуулах ур чадвар, алсын хараа, уйгагүй хөдөлмөр, хичээл зүтгэлтэй салшгүй холбоотой хэмээн эрүүл мэндийн салбарын хамт олон, Эрүүл мэндийн яамны хамт олон үздэг хэмээгээд тус сургуулийн үе үеийн удирдлагуудад хамт олныхоо өмнөөс болон хувиасаа талархал илэрхийллээ.
Эрүүл мэндийн сайд Н.Удвал ЭМЯ-ны зүгээс ЭМШУИС-ийн хамт олонд 180 сая төгрөгийн үнэ бүхий иж бүрэн Дижитал рентген аппарат, эмнэлгийн тусламж үйлчилгээний чанар, аюулгүй байдлын үндэсний судалгаа захиалах 50 сая төгрөгийн эрхийн бичгийн хамт тус сургуулийн удирдлагуудад хүлээлгэн өгөв. Энэ нь ирээдүйн боловсон хүчнийг мэргэшүүлэхэд томоохон хувь нэмэр оруулсан оновчтой хөрөнгө оруулалт болж эрүүл мэндийн салбарыг шинэчлэхэд дэмжлэг үзүүлэх нь дамжиггүй.
ЗХУ-д Дэлхийн II дайн үргэлжилж байсан хэдий ч манай улсын эмнэлгийн дээд мэргэжилтэй боловсон хүчин бэлтгэж эхлэхэд тус улсын багш анхны хичээлийг зааж байжээ. Тус сургуулийн анхны төгсөгч, Анагаах ухааны доктор Ч.Долгор түүхт ойн баярын хуралд хүрэлцэн ирж 1942 оны 10 дугаар сарын 1-ний өдөр анхны 54 оюутан элсэж түүнээс 13 нь төгссөн анхнаасаа хатуу, чанга сургалттай байсныг хэлээд үеийн нөхөд болон анхны багш нараа дурсан ярилаа. Тэрбээр сургуулийнхаа хурдацтай хөгжлийг төр засгийн авч хэрэгжүүлж буй арга ажиллагаатай холбон үзэхээс гадна багш, удирдлагуудын нөр их хөдөлмөрийн ач тус гэдгийг хэлээд сургуулийнхаа хамт олонд эрүүл энх, аз жаргалтай амьдралыг хүсэн ерөөв.
Харин ЭМШУИС-ийн захирал, профессор, академич Ц.Лхагвасүрэн сургуулиасаа төрөн гарсан алдартнууд, сургуулийн нэрийн хуудас болсон оюутан залуусаараа бахархаж явдаг аа хэлээд сургуулийнхаа гаргасан томоохон амжилтуудаасаа цугласан олон зочдод танилцууллаа. ЭМШУИС нэг хүнд ногдох бүтээлийн тоо, чансаагаараа Монголын сургуулиудын тэргүүнд орсноос гадна Олон улсад хүлээн зөвшөөрөгдөн, магадлан итгэмжлэгдсэн байна. Мөн эрдэмтэн профессоруудын уйгагүй их хөдөлмөрийн хүч, оюутан залуусын чадвараар хангалттай сайн гэсэн үнэлгээтэй яваа гэдгээрээ сургуулийн захирал Ц.Лхагвасүрэн бахархан их сургуулийн бие даасан байдал төгөлдөржиж байгааг онцлоод хамт олон болон гадаад, дотоодын нийт зочид төлөөлөгчдөд баярын мэнд дэвшүүлэв.
ЭМШУИС гадаадын олон сургуулиудтай хамтран ажилладаг бөгөөд сургуулийн 70 жилийн ойн хүндэтгэлийн арга хэмжээнд 24 орны 144 сургуулийн удирдлагууд хүрэлцэн ирсэн нь тус сургуулийн нэр хүнд өндөр байдгийг харуулсан юм. Ийнхүү тус сургуульд ирж буй баярын мэндчилгээ, сэтгэлийн үг тасралтгүй хөвөрч байлаа.