Казахстаны Актау хотод болсон гэмт халдлагад Монгол улсаас ирсэн иргэний нэр холбогдлоо. Өнгөрсөн даваа гарагт 16 цагийн орчим зэвсэглэсэн этгээдүүд “Лада” машин руу довтолжээ. Гэрчийн мэдүүлгээс үзвэл хоёр удаа буун дуу гарчээ. Машин дотор жолоочоос гадна нэг хүн байсан байна. Гартаа шарх авсан жолооч зугтаж,  харин эрэгтэй зорчигч толгойдоо буудуулж, хүнд шарх авчээ. Хэргийн газар санамсаргүй байсан хүн уг эрэгтэйд анхны тусламж үзүүлэн, түргэн дуудсан байна. Одоо уг эрэгтэйн биеийн байдлыг эмч нар туйлын хүнд гэж мэдэгдээд байгаа юм.
   Хэрэгтнүүд “Опель" маркийн машинаар зугтсан гэж гэрч нар мэдүүлжээ. Хуурамч дугаартай уг машиныг сүүлд хотоос зайдуу газар орхин одсон байхыг олсон байна. Хохирогч Казахстаны нэртэй бизнесмений хүү байсан бөгөөд машинд нь 50 сая тэнгэ буюу 330 мянган ам.доллар байв. Сэжигтнүүдийн нэг нь Монголоос ирсэн этгээд гэж цагдаагийнхан мэдэгдэв.