Монгол банкны дэд ерөнхийлөгчөөр МАХН-ын дарга Н.Энхбаярын хүү Э.Батшугарыг томилох асуудлыг хэлэлцэх үеэр тус байгууллагын хараат байдлын асуудлыг гишүүд хөндөж байлаа. УИХ-ын гишүүн С.Дэмбэрэл "Сонгууль болгонд захирал, удирдлагууд нь өөрчлөгддөг байдал хэзээ солигдох вэ? Энэ удаа залуу, чадвартай боловсон хүчин орж ирж байгаа нь сайн хэрэг. Э.Батшугарыг дэмжиж байна" гэлээ.

  Ж.Батзандан гишүүн "20 гаруй настай, чадвартай, залуу хүн орж ирж байгаад дэмжиж байна. Монгол хүнд шударга ёс, хүн чанар хэрэгтэй. Төрийн өндөр албан тушаалд очиж байгаад баяр хүргэе" гэв.
   Мөн Г.Баярсайхан гишүүн "Хэний аав,  хүү байх нь хамаагүй. Энэ салбарт өөрийн замаар ажиллах хэрэгтэй. Дэмжиж байна" гэлээ. Ийнхүү гишүүд саналаа хэлсний дараа санал хурааж Энхбаярын Батшугарыг 85,4 хувь нь буюу 41 гишүүн дэмжиж, томиллоо. Харин С.Оюун, Х.Тэмүүжин, Д.Дэмбэрэл, Су.Батболд нарын 7 гишүүн татгалзсан санал өгсөн юм.

   Өнөөдрөөс Монголбанкны дэд ерөнхийлөгчөөр ажиллах болсон Э.Батшугар "Монгол банкны 2013 онд тавьсан том зорилтыг биелүүлэхийн тул өөрийн туршлагаас хуваалцан ажиллах болно. Ямар нэг улс төрийн зорилго байхгүй мэргэжлийн түвшинд ажлаа хийнэ" гэлээ.