Үнийн өсөлтийн эсрэг авч хэрэгжүүлэх арга хэмжээний талаар Монгол Улсын Ерөнхий сайд Л.Оюун-Эрдэнэ, Засгийн газрын гишүүд мэдээлэл хийж байна. Энэ үеэр Монгол банкны Ерөнхийлөгч Б.Лхагвасүрэн сэтгүүлчдийн асуултад хариуллаа.
Тэрбээр "Төв банк мөнгө хэвлэхгүй, хөтөлбөр гарах үед мөнгө хэвлэх үү? гэдэг асуудал гарч ирдэг. Ковидын хүнд үед Засгийн газрын санаачилсан “Эрүүл мэндээ хамгаалж, эдийн засгаа тогтворжуулах” хөтөлбөрийг хамт хэрэгжүүлж байхдаа аль болох мөнгө хэвлэхгүй, банкны салбарт хуримтлагдсан чөлөөт эх үүсвэрүүдийг түлхүү ашиглах бодлого баримталсан. Иймд өнгөрсөн онд хоёр их наядын гурван хувийн хүүтэй зээл гаргасан байгаа. Энэ нь өөрөө банкуудын эзэмшиж байсан төв банкны үнэт цаасан дээрх чөлөөт хөрөнгийн тодорхой хүүний хөнгөлөлт үзүүлэх замаар эргээд зээл олгосон. 2021 онд зээлийн хэмжээ 20 орчим хувиар нэмэгдсэн, үүнийг дагаад эдийн засгийн сэргэлт гарч 1,4 хувиар өссөн. Үүнтэй адил төв банкны чөлөөт эх үүсвэрийг ашиглана гэж харж байгаа” гэв.
