Үнэ тогтворжуулах хуулийн төслийн талаар УИХ-ын гишүүн Хүрэлбаатар байр сууриа илэрхийллээ. Тэрбээр "2022 онд манай эдийн засагт тулгамдаж байгаа гол асуудал бол үнийн өсөлт. Үнийн өсөлтийг мөнгө хэвлэж шийднэ гээд оруулаад ирсэн. Мөнгө хэвлэж  үнэ тогтворжуулахыг би мэдэхгүй юм байна. 2013-2016 оны хооронд Н.Алтанхуяг, Ч.Сайханбилэгийн засгийн газар Монгол банкны ерөнхий захирал Н.Золжаргал гэдэг хүн байхад ийм зүйл хийж Монгол улсын эдийн засгийг сонгодог утгаар нь алсан. Тэр давтагдах гээд байна. Өөр зөндөө олон шийдэл байгаа. Хамгийн болж бүтэхгүйг нь, улс орноо хорлох гэсэн заалт оруулаад ирсэн байна. Монгол банканд ямар мөнгө байдаг юм бэ. Монгол банк баялаг бүтээгч биш. Өөрийн гэсэн мөнгө байхгүй. Тэгэхээр мөнгө хэвлэхээс өөр арга байхгүй. Мөнгө хэвлэхийг хуулиар хорьчихсон шүү. Сая хэвлэхгүй гэж байх шиг байна. Ард талдаа бас хууль нь байна шүү дээ. Үүн дээрээ мөнгө хэвлэнэ гэсэн байна. За яах вэ мөнгө хэвлэе. Хэвлээд та нар ААН-үүдэд мөнгө олго. Тэр мөнгө хаанаас гарах юм бэ. Улсын төсвөөс гарахгүй. Тэгэхээр Монгол банкнаас гарна. Монгол банк хэвлэж өгнө. Үүнээс өөр зүйл харагдахгүй байна.

Тэр 2013-2016 онд мөнгө хэвлэж байх үед ханш өссөн. Одоо хоёр ханштай явж байна. Эрх мэдэлтэй хүмүүс 2900 төгрөгөөр ханш аваад байна. Харин ард иргэдэд 3200 төгрөгөөс доош олдохгүй. Хоёр ханш байна гэдэг нь эрх мэдэлд ойрхон байгаа хүмүүс нэг доллар дээрээс 300 төгрөгийн ашиг хийж бизнес хийж байгаагаас ялгаагүй. Мөнгө хэвлэж эхэлвэл энэ улам гаарна. Мөнгө хэвлэж эхлээд 1360 байсан ханш 2000 гараад явсан. 2000 дээр нь барих гэж өчнөөн их нөөцөө зарсан. Бодитоор бол 2400, 2500 гарсан байсан. Энэ бол буруу.

Мөнгө хэвлэхгүй гэж хийвэл яаж хийхийг хэлээд өгөх үү. Арилжааны банкууд ААН-үүдэд зээл олго. Хүүгийн зөрүүг төсөв дээрээ тавиад тэрийг нь өг. Ингээд л болоо. Монгол улсын бүх хуулинд нийцнэ. Ямар ч зовлонгүй шийдэл энэ.

Урьд өмнө нь ямар ч шийдэл гараагүй, өчнөөн хүн эрүүгийн хэрэг үүсгээд шалгагдаж байгаа зүйл дээр яг тэр аргыг хэрэглэнэ гээд оруулаад ирсэн байна. Сүүлийн 30-иад жил хоёр ханштай байгаагүй. Өөрийн чинь үед л бий болж байна. Тайлбарууд чинь бүгд худлаа. Тийм учраас аргаа өөрчил.

Импортын хувь хэмжээг тогтоох эрхийг засгийн газар авна гэсэн байна. Импорт дээр бол хэрэггүй. Импортын эрхийг УИХ авч яах гээд байгаа юм бэ. Буруу замаар будаа тээвэл, буцахдаа шороо тээнэ гэдэг шүү" гэв.

Д.Батчулуун