ТЕГ-ын Олон нийттэй харилцах хэлтсийн албаны мэргэжилтэн П.Өгөөмөр мэдээлэл хийлээ. Тэрбээр “Монгол улсын иргэн итгэл үнэмшилтэй байх, үзэл бодлоо чөлөөтэй илэрхийлэх, үг хэлэх, хэвлэн нийтлэх, тайван жагсаал хийх эрх чөлөөтэй. Энэхүү эдлэх эрхийнхээ хүрээнд иргэдийн зохион байгуулж буй жагсаал цуглааны үед хүний эрүүл мэнд, амь насанд халдаж, үймээн самуун, өдөөн хатгах, турхирах зорилготой зохион байгуулалтад орсон этгээдүүдийг Тагнуулын байгууллага шалгаж байна. Тодруулбал, Тагнуулын байгууллагаас эрүүгийн хуульд заасны дагуу экстремист гэмт хэрэг үйлдэхээр бэлтгэж байсан Монгол улсын нэр бүхий таван иргэнийг саатуулсан ба мөрдөн шалгах ажиллагаа үргэлжилж байна. Дээрх этгээдүүд нь экстремист үйл ажиллагаа явуулахаар багагүй хугацаанд төлөвлөн бэлтгэж байсан. Тухайн этгээдүүдийн орон гэр, ажлын байр хийсэн үзлэг нэгжлэгээр улсын онц чухал объектуудыг зэвсэглэн хяналтад авахаар төлөвлөсөн гар бичмэл, хууль бусаар олж авсан байлдааны болон бусад зориулалтын галт зэвсэг, зэвсгийн чанартай галт зэвсэг илэрсэн.
Нийт арванхоёр галт зэвсэг илэрсэн. Тухайлбал, АКА-47 маркийн серийн дугаарыг зориудаар арилгасан автомат дуу нэг ширхэг, Волтер маркийн гар буу нэг ширхэг, ТТ-50 маркийн гар буу нэг ширхэг, бүртгэлгүй галт зэвсэг таван ширхэг тус тус байсан. Үүнээс гадна 7,62мм байлдааны сум 272 ширхэг, 6,5мм 82 ширхэг, 223мм 149 ширхэг, 5,6мм 291 ширхэг, 12мм 57 ширхэг, 16мм 14ширхэг, нийт 861 ширхэг сум болон тэсэрч дэлбэрэх хэрэгсэл зэрэг илэрснийг эд мөрийн баримтаар хураан аваад байна.
Дээрх этгээдүүд зохион байгуулалттай хууль бус үйл ажиллагаа явуулахаар бэлтгэж байсан бөгөөд зарим нэр бүхий улс төрч, төрийн албан хаагчийн амь насанд халдахаар төлөвлөж байсан нь мөрдөн шалгах ажиллааны явцад илэрч байна. Мөн хэргийн нэг холбогдогч дээрх үйл ажиллагаанд хэрэглэхээр бэлтгэж байсан бүртгэлгүй галт зэвсгээр нэгнийгээ санаатайгаар буудан хүнд гэмтэл учруулсан. Эрүүгийн хэргийг нэгтгэн шалгаж байгаа. Иймд иргэдийн зохион байгуулж буй тайван жагсаал цуглааны үеэр зэвсэг, зэвсгийн чанартай эд зүйлс, тэсэрч дэлбэрэх хэрэгсэл ашиглан нийтийг хамарсан эмх замбараагүй байдал үүсгэх, гэмт хэрэг үйлдэх санаа зорилго бүхий бүлэг этгээд байхыг үгүйсгэхгүй. Тиймээс иргэд жагсаал цуглаанд оролцохдоо сонор сэрэмжтэй байх, бусдын өдөөн хатгалтад автахгүй байхыг анхааруулж байна” гэв.
Д.Батчулуун
