УИХ-ын чуулганы хуралдаан болж байна. Чуулганаар гол нэр төрлийн бараа, бүтээгдэхүүний үнийн өсөлт, хомсдолоос сэргийлэх тухай хуулийн төслийг хэлэлцэж байна. Энэ үеэр Сангийн сайд Б.Жавхлан үг хэлж, асуултад хариуллаа. Тэрбээр “ОХУ гадаад төлбөр тооцоо, байгалийн хий газрын тосныхоо үнийг рублиэр авна шүү гээд зарласан байгаа. Манайд рубль байдаг бол үүн шиг таатай нөхцөл байхгүй. Гэхдээ энэ байдлаас гарахын тулд ОХУ-ын төв банканд хүсэлт тавьж байгаа. Үүссэн нөхцөл байдалтай холбоотой шийдчих болов уу гэж хүлээж байна. Гэрээ хэлэлцээрүүд хийхийг шамдуулж өдөр бүр хандаж байгаа. Хоёр төв банк үндэсний мөнгөн тэмдэгтүүдээрээ солилцоо хийчихвэл энэ хүнд цаг үед долларын дарамтаа хөнгөвчлөх боломж бий. Нааштай шийдчих болов уу гэсэн хүлээлттэй байна. Шатахууны жилийн хэрэгцээний төлбөр оргил үедээ 1,8 тэрбум доллар байдаг байсан. Одоо үнэ нэмэгдээд 1,4-1,5 тэрбум доллар байна. Он дуустал 1 тэрбум доллартой тэнцэх рубль төгрөгийн солилцоо хийчихвэл валютын нөөцийн дарамт буурна. Энэ тал дээр ажиллаж байна. 

Үнэ тогтворжуулах хөтөлбөртэй зэрэгцүүлж ярих нь зөв. Өмнө нь алдсан оносон зүйлийг харьцуулж харах зөв. Харин энэ удаагийнх хоёр зүйл дээр өөр байгаа. Тухайлбал, төр хувийн хэвлийн байгууллагууд ямар нийгмийн хариуцлагын хүрээнд оролцох вэ гэдгийг маш тодорхой зохицуулалт хийнэ. Хууль тогтоох дээд байгууллагад өргөн бариад олон нийтийн өмнө нээлттэй ярилцаж байна. Үүнд эцсийн шийдвэр гарна. Мөн 2022 оны бодлого, хуулийн хүрээнд бид ажиллана. Өнөөдрийн бидний гадагшаа төлж байгаа доллар болгон нэг доллар 20 центээс дээш дарамт болж орж ирсэн. Саяхан төв банк мөнгөний бодлогын хүүг өсгөсөн. Өөрөөр хэлбэл, хатуу төлөв рүү шилжсэн. Үүнээс хойш нэг ч төгрөгийн мөнгөний нэмэлт хийхгүй. Боломжит хэмжээгээрээ зах зээлээс мөнгө эргүүлэн татна гээд ингэж зарласан. Үүнтэй төсвийн бодлого уялдаж явна. Хамаагүй хутгалдахгүйгээр алтан заагаа бариад явна” гэв. 

Д.Батчулуун