Ерөнхийлөгч, ерөнхий сайд, УИХ-ын дарга гээд төрийн гурван өндөрлөгт байсан Н.Энхбаярын хүү Э.Батшугарыг УИХ-ын гишүүн, сайд, дэд сайдын аль нэг нь болно гэж тааж байсан ч тэр хүү огт ондоо албан тушаалд очлоо. Хэний ч таагаагүй тийм нүүдлийг хийж Монгол банкны 25 настай, залуухан дэд ерөнхийлөгч болов. Хир ороогүй гэдэг шиг сэтгүүлчид, хов жив жиргээчдийн хараанаас ангид байсан гайгүй сайн томилгоо л доо. Э.Батшугар энэ албанд томилогдохдоо УИХ-ын ах нарынхаа өмнө “Монгол банкны 2013 онд тавьсан том зорилтыг биелүүлэхийн тул өөрийн туршлагаас хуваалцан ажиллах болно. Ямар нэг улс төрийн зорилго байхгүй мэргэжлийн түвшинд ажлаа хийнэ" гэж амласан. Тэрбээр өөрийгөө Монголын эдийн засгийн бодлогыг тодорхойлж байгаа Монголбанкныханд хуваалцах хангалттай туршлагатай гэж үздэг бололтой. Э.Батшугар нь 2008 онд АНУ-ын Бентлигийн Их Сургуулийг Эдийн засагч, санхүүч мэргэжлээр төгссөн. АНУ-ын "Жей Пи Морган" компанид хоёр жил санхүүгийн мэргэжилтэнээр ажилласан туршлагаараа ийнхүү Монгол банкны дэд ерөнхийлөгч болж байна. Одоогийн Монголбанкны ерөнхийлөгч Н.Золжаргал Харвардын их сургуулийг төгсөөд 27 настайдаа Хөрөнгийн биржийн захирал болж байв. Үүнээс 14 жилийн дараа Монголбанкны дэд ерөнхийлөгч буюу Э.Батшугарын анзаанд хүрч байжээ. Харин УИХ-ын гишүүн С.Баярцогт 25 настайдаа парламентын гишүүн болж байсан түүхтэй. Үнэхээр Э.Батшугар мэдлэг, чадвартай залуу хүн гэдгийг үгүйсгэж болохгүй ч Н.Энхбаярын хүү гэх нэр түүнийг хэзээд дагах юм. 

   Н.Энхбаяр өнөөдөр ялын хэмжээ сонсоод, Монголд өмнө нь гарч байгаагүй эмгэг өвчин туссан хамгийн өрөвдөм хүн болж хувирсан. Гэлээ ч сүүлийн хэдэн өдөр өрнөсөн үйл явдал түүнийг “болоогүй шүү” гэдгийг харуулж байх шиг. Ц.Цолмон гишүүнийг намаас нь урвуулж, хүүгээ том албан тушаалд томиллоо. МАН-ын дарга Н.Энхтүвшин хүртэл түүнтэй хөөцөлдөн байж уулзаж, мэндийг нь мэджээ. Тэдний "гал халуун" уулзалтыг харсан шадар сайд Д.Тэрбишдагвын хоолой нь хүртэл зангирч байсан гэнэ. Төрийн томчуудыг өрөөндөө цуглуулан түүнийг юу ярьж, ямар заавар зөвлөмж өгсөн талаар одоохондоо хэн ч ам нээхгүй. Гэхдээ Э.Батшугар гэдэг нэр тэр дунд хавчуулаастай байсан нь лавтай гэх хүн олон. 

    Манай улс төрд Н.Алтанхуяг гэдэг сайдтай Засгийн газар, З.Энхболд гэдэг даргатай парламент байгаа ч эмнэлгийн орон дээрээсээ биднийг удирдах Н.Энхбаярын гэх засаглал зэрэгцэн оршиж байх шиг. Могой гурав тасравч гүрвэлийн дайтай гэдэг шиг Н.Энхбаярын нөлөөлөл улс төрд мэдрэгдэхүйц, харагдахуйц байсаар л байна.

                                                                                                                                    Т.Гэрэл 24tsag.mn