УИХ-ын гишүүний бүрэн эрхийг түдгэлзүүлэх санал Ерөнхий прокурор оруулж ирсэн тохиолдолд УИХ ажлын таван өдөрт багтан хэлэлцэн шийдвэрлэх ёстой байдаг. Ерөнхий прокурорын саналаар хамгийн түрүүнд санал дүгнэлтээ УИХ-ын Халдашгүй байдлын дэд хороо гаргадаг. Энэ санал дүгнэлтийг Хууль зүй, Төрийн байгуулалтын байнгын хороо хэлэлцэх бөгөөд Төрийн байгуулалтын байнгын хорооны санал дүгнэлтээр УИХ санал хураадаг билээ.

Тэгвэл гишүүний бүрэн эрхийг түдгэлзүүлэх эсэхээр хамгийн түрүүнд санал дүгнэлт гаргадаг УИХ-ын Халдашгүй байдлын дэд хороог УИХ-д хамгийн олон удаа сонгогдсон таван гишүүн бүрдүүлдэг. Энэ удаагийн парламентын Халдашгүй байдлын дэд хороог Н.Энхболд гишүүн даргалдаг бөгөөд гишүүд нь С.Батболд, Б.Бат-Эрдэнэ, С.Бямбацогт, Ц.Мөнх-Оргил нар билээ. Халдашгүй байдлын дэд хорооны гишүүн С.Бямбацогтын хувьд бүрэн эрхийг нь түдгэлзүүлэхээр Ерөнхий прокурор санал оруулж магадгүй гэсэн найман гишүүний нэг юм.

С.Сүлд