“Хүнсний хангамж, аюулгүй байдал-Газар тариалан” үндэсний чуулган болж байна. Энэ үеэр Хүнс, Хөдөө аж ахуй, Хөнгөн үйлдвэрийн сайд З.Мэндсайхан мэдээлэл хөглөө.

Тэрбээр “Монгол Улсын Ерөнхийлөгчийн  ивээл дор “Хүнсний хангамж, аюулгүй байдал-Газар тариалан” үндэсний чуулган болж байна. Бид хаврын тариалалтынхаа өмнө тариалан эрхлэгч, агрономичид, үр тариа эрхлэгчид, хүнсний ногоо тариалан эрхлэгчидтэй нэгдсэн байдлаар уулзаж, салбарын тулгамдаж буй асуудлыг хамтраа хэлэлцэж шийдвэрлэхээр энэхүү зөвлөгөөнийг зохион байгуулж байна. Зөвлөгөөн цаг үеийн хувьд онцлогтой үед болж байна.

Тухайлбал, Цар тахлын дараа үе буюу дараа үеийн эдийн засгийн сэргэлтийн үе гэж харж байсан. Гэтэл ОХУ, Украин улсад болж буй хямралын үед хүнсний хангамжийн хэрэгцээ ямар чухал гэдгийг олон нийт харж байна. Энэ нь маш хурц асуудал болон тавигдаж байна. Энэ хүнд цаг үед Монгол улс хүнсний ногоо, үр тариагаа дотоодоосоо бүрэн хангадаг байх ёстой. Энэ зорилтыг Засгийн газарт тавьж байна. Засгийн газар энэ хаврын тариалалтаас өмнө шат  дараатай арга хэмжээ авч байгаа. Үр тарианы салбарт 150 тэрбум төгрөгийн эх үүсвэр гаргалаа. Тухайлбал, 100 тэрбум төгрөгийг үр тариа эрхлэгчдэд, 50 тэрбум төгрөгийг хүнсний ногоо эрхлэгчдэд зориулсан. Мөн түүнчлэн ургамлын тосны үйлдвэр болон гурил боловсруулагч үйлдвэрүүддээ зориулан 40 тэрбум төгрөгийн эх үүсвэр гаргасан. Энэ жил бид хүнсний ногооны тариалалтыг нэмэгдүүлэх зорилгоор Засгийн газраас хүнсний ногооны ил талбайн дэмжлэг буюу татаас олгохоор болсон. Тухайлбал, тонн тутамд 100 мянган төгрөгийн дэмжлэгийг ногоочдод олгоно. Энэ бол хүнсний ногооны тариалалтыг дотоодоосоо хангахад маш том хөшүүрэг боллоо гэж харж байна” гэв.

Д.Батчулуун