Эдийн засаг хүндэрч байгаа энэ үед УИХ-ын даргын захирамжаар Төсөвт тодотгол хийж, хөрөнгө оруулалтыг танах ажлын хэсгийг байгуулсан. УИХ-ын гишүүн Х.Булгантуяагаар ахлуулсан эл ажлын хэсэг өөрсдийн гаргасан саналаа намын бүлгүүдэд танилцуулаад байгаа.

Түүний дараа УИХ дахь МАН-ын бүлгийн дарга Д.Тогтохсүрэн хэвлэлийнхэнд мэдээлэл өгөхдөө гишүүдийн унааны зардлыг танах эсэхээр өөрийн байр сууриа илэрхийлсэн.

Тэрбээр, “УИХ-ын дарга, дэд дарга, Байнгын хорооны дарга нар албаны унаа унадаг. Бусад бүх гишүүн хувийн унаа унадаг. Шуудан харилцаа холбооны зардлыг 100 хувь өөрөө төлдөг. Хуучин төсвөөс төлдөг байсан. Одоо гишүүд сард явах бензиний лимит гэж таван цаас аваад хувийнхаа машинд хийгээд л явж байгаа” гэсэн юм. Тэгвэл Д.Тогтохсүрэн гишүүний хэлсэн таван цаас нь хэдэн төгрөг вэ гэдгийг танилцуулъя.

УИХ-ын гишүүд сард унааны зардалд 456 мянган төгрөг авдаг юм байна. Энэ нь жилээр тооцвол нэг гишүүн жилд унааны зардалд төсвөөс 5.4 сая төгрөг авдаг гэсэн үг юм. Өөрөөр хэлбэл 5.4 сая төгрөгийг МАН-ын дарга Д.Тогтохсүрэн “Таван цаас” гэж зүйрлэжээ.

С.Сүлд