УИХ-ын чуулганы хуралдаанаар тендерийн буюу Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд нэмэлт, өөрчлөлт оруулах тухай хуулийн төслийн хэлэлцэх эсэхийг хэлэлцэж байна. Хэлэлцэж буй асуудалтай холбогдуулан гишүүд асуулт асууж, хариулт авав.

УИХ-ын гишүүн Б.Энхбаяр: Энэ хуулийн төслийн 34.1 дээр тендергүй гэрээ байгуулж, шийдэх заалт оруулж ирж байна. Хэдэн төгрөгийн ямар төслүүдийн эрх авах гэж байна гээд үзэхээр нийт 20 тэрбум ам.долларын буюу 50-60 их наяд төгрөгийн төсөл арга хэмжээг тендергүй хийе гэж байгаа юм байна.

Тендерийн хууль авлигаас урьдчилан сэргийлэх гэж л байгаа юм. Гэтэл энэ хуулийн өөрчлөлтийг батлах юм бол энэ хуулийг хүчингүй болгож байгаатай адил зүйл болно.

Яагаад гэвэл хоёрын хооронд бичгийн цаасан дээр тендер зарлаад, том бүтээн байгуулалтыг тендергүй хийе гэж байна. Томчууд нь хувааж найрлая гэж байгаа юм байна.

Энэ хуулийн төслийн 3.13-т “төрийн өмчийн болон төрийн өмчийн оролцоотой компаниуд энэ төслүүд дээр санхүүжилт өгөхөд энэ хуулийг дагаж мөрдөхгүй” гэж байгаа юм.

Сангийн сайд Б.Жавхлан: Энд буруу зөрүү ойлголт байх шиг байна. Шинэ сэргэлтийн бодлогын хүрээнд батлагдсан 180 гаруй их наяд төгрөгийн зургаан багц 90-ээд төсөл байгаа. Энэ бүгд төсвийн хөрөнгөөр хийгдэхгүй.

Судалгаагаар 10 гаруй хувь нь төсвийн хөрөнгө оруулалтаар хийгдэнэ. Энэ хэсэг нь уг хуулийн заалтаар зохицуулагдана. Бусад нь Хөрөнгө оруулалтын, Төр хувийн хэвшлийн түншлэлийн хуулиар хийгдэх юм. Үүнийг гуйвуулж ярьж байна.