Үндсэн хуулийн асуудлаар улсын их хурлын гишүүд болон зарим намын төлөөллүүд мэдээлэл хийж байна. Энэ үеэр УИХ-ын гишүүн Т.Доржханд мэдээлэл өглөө.

Тэрбээр “Залуучууд улс орноосоо дүрвэж байна. Амьдрах арга алга. Хэмнэх юм бол өөрсдөө хэмнэ. Монголдоо хүн шиг сайхан амьдаръя гэсэн маш энгийн шаардлага тавьсан. Талбай дээр ирж чадаагүй залуучуудыг сонсъё гээд “Залуучуудаа сонсъё, өөрсдөө хэмнэ” гэсэн арга хэмжээг ХҮН намын зүгээс хийсэн. Залуучууд маш энгийн, тодорхой зүйл хүссэн. Үүнтэй холбоотойгоор өнөөдөр Засгийн газраас УИХ-д өгөх төсвийн тодотгол орж ирж байгаа. Төсвийн тодотголоор тав арван хувийн хэмнэлт гаргасан байдлаар оруулж ирж болохгүй. Тэгэх юм бол залуучууд дахин гарч ирнэ шүү.

Харин яг одоо үүн дээр дүгнэлт хийгээд, улс төрийн намууд тойрч сууж байгаад тогтолцоогоо өөрчилье. Маш энгийнээр тойрогтоо дээвэр засдаг, хаалга шийддэг улс төрчидтэй байх юм уу. Эсвэл 3,4 сая иргэнээ яаж ажлын байраар хангах вэ, яаж дэлхийд өрсөлдөх чадвартай Монгол иргэнийг ирээдүйн 30 жил бүтээх вэ гэдгийг ярьдаг УИХ-тай байх юм уу. Өнөөдөр үүнийг ярья гэж байгаа юм.

Тиймээс Ерөнхийлөгч, УИХ-ын дарга, Ерөнхий сайд нарт шаардлага хүргүүлж байна. Нэгдүгээр сарын 13-ны өдөр улс төрийн намууд санал нэгдээд Үндсэн хуулинд өөрчлөлт оруулъя гэж шийдсэн. Үүнийг өнөөдөр шийдэхгүй бол маргааш гэж байхгүй юм байна. Улсын төсвийн тодотголоор үр дүнтэй хэмнэлтийг хийж чадахгүй, өөрсдийнхөө авлигажсан том төрийг авч үлдэх санал орж ирвэл улс төрийн намын ирэх долоо хоногоос залуучуудтайгаа хамт талбайг дүүргэнэ шүү. Улс төрийн намуудын хувьд өнөөдөр маш чухал өдөр. Сонгуулийн тогтолцоо, Үндэсний аюулгүй байдал, хэмнэлтийн асуудлыг шийдвэрлэх хэрэгтэй байна. Өнөөдөр төр хамгийн их татвар төлдөг, төр хамгийн их ажлын байр бий болгодог, төр хамгийн их авилга авдаг болчихлоо. Ийм улсад хэн ч амьдрах боломжгүй. Тиймээс энэ асуудлаа шийдье” гэв.

Д.Батчулуун