Монгол Улсын Ерөнхий сайд Л.Оюун-Эрдэнэ УИХ-ын чуулганы нэгдсэн хуралдаанд үг хэллээ. Өнөөдрийн хуралдаан Монгол Улсын 2022 оны Төсвийн тухай хуульд өөрчлөлт оруулах тухай хуулийн төслийн хэлэлуүүлэгээр эхэлж байна. 

Тэрбээр “Хэрэв Гол нэр төрлийн зарим бараа бүтээгдэхүүний үнийн өсөлт, хомсдолоос сэргийлэх, сөрөг нөлөөллийг бууруулах тухай” хуулийн төслийг хэрэгжүүлж эхлээгүй байсан бол шатахууны үнэ багадаа 800-1000 төгрөгөөр нэмэгдэж үнийн өсөлт, огцом цочрол дахин үүсэх байлаа. Монгол Улсын Засгийн газраас нийгэм эдийн засгийн нөхцөл байдалтай уялдуулан Монгол Улсын төсвийн тодотголыг дагалдах хуулиудын хамт УИХ-д өргөн барьж байна” гэв.  

Төсөв дагалдуулж төрийн хэмнэлтийн тухай анхдагч хуулийг өргөн барьж байна. Төсвөөс санхүүждэг төрийн байгууллага тус бүрдээ салбар хууль, журмаар хэмнэлтийн асуудлыг зохицуулахаар оролдсон боловч нийгмийн хүлээлтэд нийцсэн эрс өөрчлөлтийг өнөөдөр хүртэл хийж чадалгүй ирсэн нь бодитой үнэн юм.

Энэхүү хуулиар дараах асуудлыг зохицуулна.

1. Төрийн тусгай чиг үүрэг хэрэгжүүлдэг агентлаг, ТӨҮГ-ууд  дэд дарга, орлогч даргатай байхыг хориглоно.

2. Нийслэлийн засаг дарга-2, аймаг, дүүрэг, сумын засаг дарга нар нэгээс илүү орлогч даргатай байхыг хориглоно.

3. Хуульд тусгайлан заагаагүй бол нийслэлд том оврын автомашин хэрэглэх, орон нутагт албан томилолтоос бусад тохиолдолд төрийн албан хаагчид төсвийн зардлаар албан тушаалын автомашин унахыг хориглоно.

4. Төсөвт байгууллагын автомашины нэгдсэн менежментийг цахимаар сайжруулах чиглэлийн хүрээнд хувийн хэвшлийн байгууллагатай хамтран ухаалаг хяналтын системд оруулснаар төсөвт ашиглаж байгаа 9800 гаруй автомашин багадаа 60 хувиар бууруулж, цаашид төр автомашин эзэмшдэггүй болох суурь реформын эхлэл тавигдана гэж үзэж байна.

5. Төсөвт байгууллагын удирдлагууд бие дааж орон тоо нэмэх шийдвэр гаргах, үндсэн цалин, нэмэгдэл, нэмэгдэл хөлс, олговор, урамшуулал олгохыг хуульчлан хориглоно

6. Гар утасны зардал, зочин төлөөлөгч хүлээж авах, хоорондоо бэлэг солилцох, төсвийн мөнгөөр цайллага зохион байгуулах, үндсэн чиг үүрэгт хамаарахаас бусад тохиолдолд урлаг спортын арга хэмжээ ивээн тэтгэх, цалин хөлс олгох, сургалтын төлбөр санхүүжүүлэх, хандив тусламж олгох, гадаад томилолтоор зорчихдоо бизнес ангилалд зорчих, төрийн тусгай албан хаагчаас бусад албан хаагч дүрэмт хувцас хэрэглэхийг хориглоно.

Энэ удаагийн төсвийн тодотголоор:

Конторын барилга- 6

Наадмын талбай- 3

Соёлын төв -7

Спорт заал, цогцолбор-3

Усан бассейн-2

Конторын тоног төхөөрөмж-18

Конторын эх засвар- 12

Айргийн өргөө-1

Орон нутгийн тохижилт-6

Нийтийн эзэмшлийн зам талбай-3 зэрэг, нийт 33 арга хэмжээг хассан бөгөөд цаашид хөшөө дурсгал, угтах, үдэх хаалга зэрэг орон нутгийн шинж чанартай үрэлгэн төслүүдийг улсын төсвөөс санхүүжүүлэхийг хориглоно. Эдгээр зардлыг хэмнэснээр үйл ажиллагаа болон удирдлагын зардал 20 гаруй хувиар нэмэгдэж, 1500 гаруй орон тоо хасагдахаар тооцлоо.

Хоёр, Үнийн өсөлтөөс сэргийлж, иргэдийн амжиргааг дэмжих байдлаар дараах арга хэмжээнд 2022 он дуустал зарцуулахаар тусгалаа. Үүнд,

• НДШ-ээ өөрөө хариуцан төлсөн, нэг сая төгрөг болон түүнээс доош орлоготой даатгуулагчийн шимтгэлийн 50 хувийг буцаан олгох,
• Хүүхдийн 100.000 төгрөгийн дэмжлэгийг үргэлжлүүлэн олгох,
• Дотооддоо хүнс үйлдвэрлэх, хүнсний нөөц бүрдүүлэх, хаврын тариалалтын бэлтгэл ажлыг хангах, дөрвөн улиралын хүлэмж байгуулах, нэг их наяд төгрөгийн гурван хувийн хөнгөлөлттэй зээлийн хүүгийн татаасыг улсын төсвөөс олгох,
• Гол нэр төрлийн хүнсний бүтээгдэхүүн болох цагаан будаа, элсэн чихэр, ургамлын тосны үнийн өсөлтийн дарамтыг бууруулах зорилгоор гаалийн татвараас чөлөөлөх,

Т.Мөнхжаргал