Хууль зүй, дотоод хэргийн сайд Х.Нямбаатар мэдээлэл өглөө. Тэрбээр "Шивээ хүрэнгийн боомт дээр очсон. Шивээ хүрэнгийн боомтыг Хятадын талаас өнгөрсөн оны аравдугаар сарын 6-ны өдөр зогсоосон. Одоогоор зургаан сар гаруй болж байна. Шивээ хүрэнгийн боомт их онцлогтой. ААН-үүд нь хилийн боомтынхоо орчимд олборлолт хийдэг. Яг дөрөв таван ААН-ын гадна талд ухаад гаргачихсан 6,8 сая тонн бэлэн байна. Өөрөөр хэлбэл, экспортлоход бэлэн болсон. Хятадын талын боомтын захиргааныхан болон Өвөрмонголын Өөртөө засаг орны боомтын зөвлөлийнхөн Сэхээ боомт дээр очиж ажиллаад, барилга байгууламжийн ажлыг улсын комисст авах ажил хийгдэнэ. Манай талаас халдвар хамгааллын дэглэмийг бариулна. Мөн Үлэмж гэдэг компани гүйцэтгэхээр санхүүжилт аваад, зураг төслөө батлуулаад ажиллаж байгаа юм билээ.
Таван толгойн бүлэг ордын Баруун наран орчмоос 270 км засмал зам тавиад Цагаан дэл боомт руу холбох, барьж эзэмших, шилжүүлэх нөхцөлтэй концесс эзэмшигчээр Өсөх зоос, Ундрах говь компани шалгарсан юм билээ. Надтай уулзсан 300 гаруй хүмүүс тэр замыг бариулахгүй гэх шаардлагыг тавьсан. Би тэр уулзалтад таван цаг гаруй суусан. Тэдгээр хүмүүс сүүлийн 30-иад жил уул уурхай ашигтай үр өгөөжтэй гэдгийг ойлгож ирсэн. Гэтэл өнөөдрийг хүртэл бидэнд үр өгөөж өгөхгүй байна гэх зүйлийг ярьсан. Мөн манай малчид уул уурхайн мэдлэгтэй болсон байна. Би өнөөдрийн засгийн газрын хуралдаанаар иргэдтэй уулзсан талаарх мэдээллийг хүргүүлсэн. Нэг зүйл дээр тохиролцсон. Тухайлбал, Нийт хуримтлагдсан нүүрснийхээ 50 хувийг экспортолж чадвал шинэ борлуулалт хийе гэж айлын талтай тохирсон. Өнөөдрийн хурдаар явбал хоёр сар, магадгүй гурван сарын хугацаа хэрэгтэй. Харин энэ хурдаа нэмэгдүүлбэл 30, 40 хоногийн дотор хоёр сая гаруй тонн нүүрсээ гаргачихмаар байна. Өчигдөр 280 гаруй тээврийн хэрэгслээр 300 гаруй тонн нүүрс зарсан байна. Нөгөө талаас танай тээврийн жолооч нарын ковидын шинжилгээ сөрөг гараад байвал тоогоо нэмэгдүүлээд явья гэсэн. Хамгийн гол нь халдвар хамгааллын дэглэмээ сайн сахих хэрэгтэй байна.
Дараагийн очсон боомт бол Ханги-мандалын боомт. Бид хэд хэдэн нөхцөл шаардлагыг тавьсан. Айлын талаас биднийг эхний ээлжид 30 машинаар нэмэгдүүлэн, хоногтоо 80 болгоё гэсэн. Бидний зүгээр хагас сайн өдөр ажиллах саналыг тавьсан. Мөн л ААН-үүдтэй уулзсан. Боомт хүртэлх зам тээврийн асуудлын нэгдсэн байдлаар зохион байгуулалтад оруулах хэрэгтэй байсан. 14 хоногийн дараа боомтууд дээр хийж хэрэгжүүлэхээр эхлүүлсэн ажлынхаа үр дүнг үзэхээр дахиж тойрно. Бид нүүрс болон уул уурхайн бүтээгдэхүүнийг худалдан борлуулж байж орлого орж ирнэ. Ирээдүйн өв санд орлого нэмэгдэж байж хүүхдийн мөнгө тасралтгүй тавигдана. Ийм бодит нөхцөл байдал дээр ажиллаж байна” гэв.
Д.Батчулуун
