УИХ дахь МАН-ын бүлэг өнөөдөр /2022.04.25/ хуралдаж, хоёр асуудал хэлэлцлээ. Хурлын шийдвэрийн талаар УИХ дахь МАН-ын бүлгийн дарга Д.Тогтохсүрэн, дэд дарга Ж.Сүхбаатар, Ажлын албаны дарга С.Далхаасүрэн нар мэдээлэл өгч, сэтгүүлчийн асуултад хариуллаа. 

Төсвийн тухай хуулиар өрийн тааз хэтрэх гээд байгаа тул төслийг дэмжихгүй гэж Сангийн сайд асан Ч.Хүрэлбаатар мэдэгдэж байна. Ажлын хэсэг асуудалд яг ямар байр сууринаас хандах вэ?

Сэтгүүлчийн асуултад УИХ-ын гишүүн Ж.Сүхбаатар хариулт өглөө. Тэрбээр "Төсвийн тодотголтой хамтад нь УИХ-ын тогтоолын төслийг Засгийн газар санаачилж оруулж ирсэн. Тэгэхээр юуны өмнө төсвийн тодотголын асуудлаа шийдэх нь цаг үеийн тулгамдсан асуудал болоод байна. Засгийн газрын танилцуулгад болзошгүй, анхааруулсан, цаашдаа эрсдэлтэй гэх маягаар бичсэн болохоос яг өрийн таазнаас хэтрээд явчихсан асуудал байхгүй. Сангийн сайд, дэд сайд, ХЗДХ-ийн сайд нар хууль зөрчөөгүй учраас үүнийг өргөн барьж байгаа. Төсвийн байнгын хорооны дарга Ч.Хүрэлбаатар өөрийнхөө хэмжээнд байр сууриа илэрхийлсэн. Үүнийг нэг хүн шийддэггүй. Өнөөдөр бүлгийн хурлаар илэн далангуй байр сууриа илэрхийлсэн. Улстөрийн хувьд шийдэл гаргахаас гадна иргэдийн эрх ашгийг хөндсөн асуудал учир цаг хугацааны хувьд мэдээллээр хангах, ойлголцох ёстой. Тэгэхгүй бол саналын ийм их зөрүүтэй нөхцөлд энэ төслийг явуулах гээд муйхарлаад байж болохгүй. Энэ нь эрсдэл дагуулна. Гэхдээ энэ төслийг явуулах шаардлага байгаа юу гэвэл байгаа" гэв. 

Д.Батчулуун