УИХ-ын гишүүн Н.Алтанхуяг, Х.Ганхуяг, Г.Амартүвшин, Ё.Баатарбилэг нарын бүрэн эрхийг түдгэлзүүлэх асуудлаар Халдашгүй байдлын дэд хороо хуралдаж байна. Энэ талаар УИХ-ын гишүүн Н.Алтанхуяг мэдээлэл өглөө. Тэрбээр "Намайг тав дахь өдөр яллагдагч болгосон тогтоол гаргасан юм билээ. Намайг ямар хэрэгт буруутай гэж яллагдагч болгож татаад байгаа юм бэ гэдгийг сая энд тавилаа. Таван толгойгоос Гашуун Сухайт хүртэл ганцхан хар зам байдаг. MCS-ийн зам. Ухаа худгийн нүүрсийг зөөдөг машинууд явдаг. Манай орон нутгийн таван толгойн нүүрсний машинууд шороогоор явдаг байсан юм. Нүүрсний үнэ 2013 онд  70,80 доллар байж байгаад 30 доллар болтлоо уначихсан. Зардлаа багасгах шаардлага гарсан. Орон нутгийн Таван толгой компани нийлж ярьж байгаад Эдийн засгийн яамнаас энэ замыг Эрдэнэс MGL төрийн өмчийн компанид худалдаж авч өгье гэж шийдсэн. Тухайлбал, Бүх машин явах боломжтой болно. Тээврийн зардал хямдарна. Тухайн үед нэг машинаас хоёр мянган төрөг байсан. Тэгэхээр маш их мөнгө цуглана. Энэ мөнгөөрөө худалдаж авсан мөнгөө төлчихье гэж шийдсэн. Ийм л санаатай тогтоол оруулж ирсэн. Тогтоол дээр мөнгө төгрөг, тоо яриагүй. Ийм тогтол гаргасан хэргээр намайг яллагдагч болгож байна.

Засгийн газрын хуралдааны дэг зөрчсөн гэнэ. Ерөнхий сайд хүн засгийн газрын хуралдааны материалыг бүрдүүлдэггүй. Тэгэхээр улс төрийн асуудал явж байна. Өмнө нь би АТГ дээр очихдоо Хөтөлийн асуудлаар яллагдагч болгосон юм байхдаа гэж очлоо. Гэтэл есөн жилийн өмнө гаргасан замтай холбоотой шийдвэр байна. Улсад ашигтай үйлдэл байсан. Ер нь зохион байгуулалттай ажил болж байна. Гуя дагаж хүзүү гэдэг шиг л юм болж байна. Олон юм ярьдаг учраас дуугүй болгоё гэж бодож байх шиг байна. Халдашгүй байдлын дэд хороо асуудалд нухацтай хандах байх. Есөн жилийн өмнөх Засгийн газрын шийдвэрээр яллагдагч болно гэдэг инээдтэй сонсогдож байна. Гаргасан тогтоол нь Монгол улсад ашигтай байгаа биз дээ” гэв. 

Д.Батчулуун