Улсын ерөнхий прокурор УИХ-ын дөрвөн гишүүний бүрэн эрхийг түдгэлзүүлэх хүсэлтээ энэ даваа гарагт УИХ-д өргөн барьсан. УИХ-ын гишүүний бүрэн эрхийг түдгэлзүүлэх хүсэлтийг УИХ хүлээн авснаас хойш ажлын таван өдөрт багтаан хэлэлцэн шийдвэрлэх хуулийн заалт байдаг. Энэ дагуу УИХ-ын гишүүний халдашгүй байдлын дэд хороо өнөөдөр хуралдлаа. Өглөө 10.30 цагаас товлосон хурал 12.30 цагт эхэлж есөн цагийн турш үргэлжлэн дөнгөж сая дуусч байна. Халдашгүй байдлын дэд хорооны дарга Н.Энхболд эрүүл мэндийн шалтгаанаар хуралд оролцох боломжгүй гэдгээ мэдэгдсэн бол УИХ-ын гишүүн С.Батболд хоёр цаг хоцорч ирснээр дэд хорооны хурал ийн товлосон цагаас хоцорч эхэлсэн билээ. Халдашгүй байдлын дэд хороонд хуулиараа тухайн парламентад сууж байгаа гишүүдээс хамгийн олон удаа сонгогдсон таван гишүүн ордог билээ. Энэ удаагийн парламентад суугаа гишүүдээс хамгийн олон удаа сонгогдсон нь УИХ-ын гишүүн Н.Энхболд, С.Батболд, Ц.Мөнх-Оргил, Б.Бат-Эрдэнэ, С.Бямбацогт нар юм.

Есөн цаг хуралдсан Халдашгүй байдлын дэд хороо гэсэн ч өнөөдөр дүгнэлт гаргасангүй хуралдаанаа завсарлууллаа. Учир нь тэд Ерөнхий прокурорын оруулж ирсэн үндэслэлийг хангалтгүй хэмээн үзээд нэмэлт баримтууд гаргаж өгөхийг хүссэн байна. Ерөнхий прокурор нэмэлт материалуудыг маргааш Халдашгүй байдлын дэд хорооны  гишүүдэд хүргүүлэхээр болсон байна. Мөн дараагийн шалтгаан нь Халдашгүй байдлын дэд хорооны дарга Н.Энхболдтой холбоотой.

Тэрбээр эрүүл мэндийн шалтгаанаар хуралд оролцох боломжгүй байгаагаас үлдсэн дөрвөн гишүүн дүгнэлт гаргах боломжгүй болоод байгаа билээ. Учир нь, УИХ-ын гишүүний бүрэн эрхийг түдгэлзүүлэх эсэхийг нууцаар санал хураадаг бөгөөд ижил тооны гишүүд санал өгч тэнцсэн тохиолдолд дүгнэлт гаргах боломжгүй болох юм. УИХ-ын халдашгүй байдлын дэд хорооны дүгнэлт гишүүний бүрэн эрхийг түдгэлзүүлэх прокурорын саналыг дэмжих болон эс дэмжих гэсэн хоёр л утгаар гардаг билээ. Халдашгүй байдлын дэд хорооны дүгнэлт гарсны дараа уг дүгнэлтээр Хууль зүйн болон Төрийн байгуулалтын байнгын хороо хэлэлцээд УИХ-ын нэгдсэн чуулганд оруулдаг юм.

О.Балдан-Очир