УИХ-ын Халдашгүй байдлын дэд хорооны хуралдаан өнөөдөр 9.00 цагт товлосон боловч хараахан ирц бүрдээгүй байна. Уг хурлаар Улсын ерөнхий прокурорын оруулсан дөрвөн гишүүний бүрэн эрхийг түдгэлзүүлэх эсэх тухай асуудлыг хэлэлцэнэ.

Дэд хорооноос гарсан дүгнэлтийн дагуу дараа нь Төрийн байгуулалтын болон Хууль зүйн байнгын хороо уг асуудлыг хэлэлцдэг дэгтэй. УИХ-ын Халдашгүй байдлын дэд хороог тухайн парламентад суугаа гишүүдээс хамгийн олон удаа сонгогдсон таван гишүүн бүрдүүлдэг.

Энэ удаагийн УИХ-ын Халдашгүй байдлын дэд хорооны даргаар парламентад зургаа дахь удаагаа тасралтгүй сонгогдоод байгаа Н.Энхболд гишүүн, гишүүдээр таван удаа сонгогдсон С.Батболд, таван удаа сонгогдсон Б.Бат-Эрдэнэ, дөрвөн удаа сонгогдсон С.Бямбацогт, гурван удаа сонгогдсон Ц.Мөнх-Оргил нар ажилладаг юм.

Өөрөөр хэлбэл энэ таван гишүүн Ерөнхий прокурорын оруулж ирсэн УИХ-ын гишүүн Н.Алтанхуяг, Г.Амартүвшин, Ё.Баатарбилэг, Х.Ганхуяг нарын бүрэн эрхийг түдгэлзүүлэх эсэх асуудлын эхний шийдвэрийг гаргах нь ээ.

О.Балдан-Очир