Хүн амын хөгжил, нийгмийн хамгааллын яамны нэрэмжит “Алтан намар”  Ахмадын спортын явган аяллын улсын аварга шалгаруулах тэмцээн жанжин Сүхбаатарын талбайгаас гараагаа эхэллээ.

Тус тэмцээнд Улаанбаатар Төмөр замын Сайншанд өртөө, Эрдэнэт хот, Багануур дүүрэг болон нийслэлийн дүүргүүдээс бүрдсэн 24 багын нийт 150 гаруй ахмадууд оролцож байгаа аж. Ахмадууд Баянзүрх дүүргийн нутаг Хар-Усан тохойд майхант лагерь байгуулан гурав хоног буудаллах бөгөөд энэ үеэр уулын оргил, хөгжилтэй буухиа, сэлүүрт завь, багын ахлахчдын тэмцээн, Хээрийн цай амттай бооцоот тэмцээн, луужингаар хэрхэн сайн ажиллах вэ? зэрэг уралдаант тэмцээнийг зохион байгуулж эхний байрт шалгарсан багууд мөнгөн шагнал медалийн эздээр тодрох юм.

Тус тэмцээнийг Жияандорж даргатай "Адал явдал аялал жуулчлал"-ын холбоо зохион байгуулж байгаа бөгөөд тэмцээний зорилго нь спорт явган аяллыг хөгжүүлэхийн зэрэгцээ ахмадуудад хүч чадал, итгэл зориг, эрүүл мэндийг өгч, монгол хүн бүрийг эрүүл мэндийнхээ төлөө  явган аялалд явахыг уриалж байгаагаараа онцлог үйл явдал боллоо.