УИХ-ын чуулганы нэгдсэн хуралдаан эхэллээ. Хуралдаанаар Монгол Улсын нэгдсэн төсвийн 2023 оны төсвийн хүрээний мэдэгдэл, 2024-2025 оны төсвийн төсөөллийн тухай хуулийн төсөл болон хамт өргөн мэдүүлсэн "Засгийн газрын өрийн удирдлагын 2023-2025 оны стратегийн баримт бичиг батлах тухай" Улсын Их Хурлын тогтоолын төслийг хэлэлцэж байна.

Энэ үеэр УИХ-ын гишүүн Ц.Туваан үг хэлж, асуулт асууллаа. Тэрбээр, "Манай төсөв, төсвийн хүрээний мэдэгдлүүд гарахдаа нэгэн хэвийн, ахиц дэвшилгүй байна. Манай Монголд байгаа хамгийн том мөнгө бол мэдээж хувийн хэвшлийнхэн, дараа нь төсвийн мөнгө орж байгаа. Үүнд бодлогын хувьд өөрчлөлт хийхгүй бол ахиц дэвшил гарахгүй байна. Юмны үнийн өсөлт тэнгэрт туллаа.

Инфляцыг 14 хувь гэж гаргаад байгаа боловч бодит байдалд 20 гараад явсан гэж харж байна. Ард иргэдийн худалдан авах чадвар буурсан, юмны үнэ тэнгэрт хадсан, төгрөгийн ханш маш муудсан. Үүнтэй уялдуулж 2023 оны төсөв, төсвийн хүрээний мэдэгдлийг уялдуулж хийх хэрэгтэй” гэв.

Д.Батчулуун