Ерөнхий сайд Л.Оюун-Эрдэнэ Шивээ хүрэн боомт дээр ажиллаж байна. Тэрбээр "Шивээ хүрэн боомт нүүрсний экспортын 48 хувийг эзэлдэг. Жилд дунджаар 10-15 сая тонн нүүрс экспортолдог. Боломжтой хувилбараар боомтын сэргэлтийг хийж чадвал энэ тоо 40 сая тонн хүрэх боломжтой.

Тийм учраас төр засаг ААН-үүдтэйгээ, хөрөнгө оруулагчтайгаа илүү ойрхон ажиллах зайлшгүй шаардлага байна. Зэс бол бидний урт хугацааны стратеги. Дэлхий дээр зэс цаг хугацааны хувьд үнэ нэмэгдэх боломжтой. Нүүрс бол эсрэгээрээ. Нүүрс экспортлогч улс БНХАУ нүүрсний хэрэглээгээ багасгахаар төлөвлөгөө гаргачихсан байгаа. Улсын төсөвт нүүрс томоохон орон зай эзэлж байгаа. Энэ өөрөө үндэсний аюулгүй байдалд томоохон өвдөлт өгөх цаг хугацаа. 15-20 жил.

Энэ богино хугацааг их ашиглаж, эдийн засгийн бусад салбарыг төрөлжүүлэн хөгжүүлэх стратеги рүү явна гэдэг шинэ сэргэлтийн бодлогын гол цөм юм. Өнөөдөр ингээд ажиллаж байгаа нь  чухал зүйл байна. Есөн сайд ажиллаж байна. Боомт бүхэн дээр тохиролцох дүнг хараахан тохирч амжаагүй. Жилд экспортлох дундаж дүнгээ л тохирдог. Энэ нь экспортын хүчин чадал, дэд бүтцийн хүчин чадал муу байгаатай холбоотой. Шулуухан хэлэхэд Монгол улсын төр засгийн шийдвэрүүд маш их өөрчлөгдөж байсан. Тийм учраас манай улсын экспортыг оруулж төлөвлөхөөс эмээдэг гэж хэлж болно. Гашуун Сухайтын төмөр зам нэг жишээ нь мөн.

Манай улс айлын талыг уриад, хөрөнгө оруулалт оруулсны дараа бодлогоосоо буцсан. Ийм алдаа гаргахгүйгээр, төр засгийн шийдвэр тогтвортой байх шаардлагатай. Дотооддоо маргалдлаа гэхэд Монгол улс дэлхийд нэг хэлтэй. Гадаад харилцаандаа нэг цонхоор гардаг байх, Төр засгийн бодлого, өмнөх Засгийн Газрын бодлогоо үгүйсгэдэггүй байх хэрэгтэй. Бид Ардчилсан намын үед гаргасан Засгийн газрын бодлогыг үргэлжлүүлж байна" гэв. 

Д.Батчулуун