Төрийн өндөр албан тушаалтнуудын хэрэг ямар шатандаа явааг АТГ-ын Мөрдөн байцаах албаны дарга, ахлах комиссар Э.Амарбатаас тодрууллаа. -“Өргөө” хувьчлалын асуудлаар олон хүнийг шалгаж байсан. Тухайлбал, УИХ-ын гишүүн асан Ц.Батбаяр, НИТХ-ын дарга асан Д.Билэгт, БСШУЯ-ны сайд асан Н.Болормаа, МАХН-ын дарга Н.Энхбаяр. Тэднээс МАХН-ын дарга Н.Энхбаярын хэрэг л шийдэгдлээ?
-Н.Энхбаярт холбоотой хэргээс зарим хүмүүст холбогдох хэргийг тусгаарласан. Шалгагдаж байгаа хүмүүсийн зарим нь байхгүй байна. Тиймээс хэргийн мөрдөн байцаалтын ажиллагаа удааширч байна. Гэхдээ бид үргэлжлүүлэн шалгаж байгаа.
-УБЕГ-ын дарга асан Ж.Амарсанааг мөн шалгаж байгаа гэсэн?
-УБЕГ-ын дарга асан Ж.Амарсанаад холбогдох хэрэгт ТЕГ, АТГ-ын мөрдөн шалгах хэлтсээс хамтарсан ажлын хэсэг байгуулагдан шалгаж байна.
-Татварын Ерөнхий газрын дэд дарга Ж.Батбаярын хэрэг юу болж байна?
-Түүнд холбогдох хэргийг манайх мөн УМБГ-аас хамтарсан ажлын хэсэг байгуулагдаад шалгаж байна. Албан татвар төлөхөөс зайлсхийсэн мөн бусдаас хээл хахууль авсан байж болзошгүй гэсэн үндэслэлээр шалгаж байна.
-ШӨХТГ-ын дарга О.Магнай хуучин дарга асан Б.Лхагваа тэргүүтэй хүмүүсийг шалгуулахаар болсон. Энэ хэрэг юу болж байна?
-Манайд шалгуулах мэдээлэл ирсний дагуу шалгаж байгаа. Мэдээллийг гэмт хэргийн шинжтэй хэмээн шалгаж, хянаж байна. 19 хоногийн хугацаанд шалгаад шийдвэрээ гаргах ёстой.
-19 хоногийн хугацаа хэзээ дуусах вэ?
-Энэ долоо хоногийн сүүлээр дуусна.
-Гэрлэх ёслолын ордны дарга Х.Оюунчимэгийн хэрэг юу болж байна?
-Түүний хэргийг шалгаж байгаа. Мөрдөн байцаалтын ажиллагаа үргэлжилж байна.
Б.Чимэг
Сэтгэгдэл (17)