Япон, Монгол улсын хооронд дипломат харилцаа тогтоосны 40 жилийн ой энэ жил тохиож байна. Ойн хүрээнд хоёр орны харилцааг өргөжүүлэн хөгжүүлэхэд үнэтэй хувь нэмэр оруулсан хувь хүн болон албан байгууллагыг Япон улсын Гадаад хэргийн сайдын нэрэмжит болон Япон улсаас Монгол улсад суугаа Элчин сайдын нэрэмжит өргөмжлөлөөр шагнах ёслолын арга хэмжээ өнөөдөр тус улсын ЭСЯ-ны байранд боллоо.
    
Шагнал гардуулах ёслолын арга хэмжээг Япон улсаас Монгол улсад суугаа Онц бөгөөд Бүрэн эрхт элчин сайд Такэнори Шимизү нээж үг хэлсэн юм. Тэрээр, 1990 оноос хойш хоёр орны харилцан ойлголцол зузаарч, найрамдалт ажиллагаа өндөр түвшинд хүрсэн. Ийнхүү хоёр орны түншлэл байнга өсөн нэмэгдэж байгаад ардын дипломатууд буюу энгийн иргэдийн үзүүлж буй хувь нэмэр асар их гэдгийг онцлон тэмдэглэв.
   
Элчин сайд үг хэлснийхээ дараагаар Япон улсын Гадаад хэргийн сайд Коичиро Гэмбагийн нэрэмжит өргөмжлөлийг Япон хэлний орчуулагч Д.Төмөрбаатарт гардуулсан юм.

Орчуулагч Д.Төмөрбаатар, анх 20 жилийн өмнө сүмо, сүши, коничива, нихон зэрэг олон үгийг орчуулахад бэрхшээлтэй байсан. Өнөөдөр тэдгээрийг үгийг орчуулах шаардлагагүй болсон байна. Энэ нь хэдийгээр энгийн жишээ юм шиг боловч хоёр орны харилцан ойлголцол өдрөөс өдөрт нэмэгдсэний тод илрэл. Өнөөдөр Монгол хүн "Япон хүн "чанартай", япон бараа чанартай" гэж хүлээж авдаг болсон. Энэ жишгээр явбал ирэх 20 жилд орчуулагч хүний ажил ихэд хөнгөрсөн байх болов уу гэсэн бодолтой байна хэмээн сэтгэгдлээсээ хуваалцсан юм.
     
Шагнал гардуулах ёслолын нэг дэх удаагийн арга хэмжээгээр хувь хүмүүсийн төлөөлөл 5 хүн, 7 албан байгууллага шагнуулав. Япон улсаас Монгол улсад суугаа Элчин сайдын нэрэмжит өргөмжлөлийг "Их засаг" их сургуулийн захирал, Монгол, Японы харилцааг дэмжих "Түншийн холбоо" нийгэмлэгийн гишүүн Н.Ням-Осор, Улсын филармонийн дарга, "Түншийн холбоо" нийгэмлэгийн гишүүн Ч.Даваасүрэн, "Цагаан хус" нийгэмлэгийн тэргүүн, "Түншийн холбоо" нийгэмлэгийн гишүүн Г.Янжинлхам, "Орхон" дээд сургуулийн захирал, "Түншийн холбоо" нийгэмлэгийн гишүүн Н.Хажидсүрэн нарт гардуулсан. Харин Монголын Икэбанагийн холбоо, Монголын Кэндамагийн холбоо, Монголын Жүдо бөхийн холбоо, Монголын Кэндогийн холбоо, Монголын Оригамигийн холбоо, Дарханы "Наран" 23 дугаар сургууль, Хүүхдийн ордон зэрэг байгууллага мөн Элчин сайдын нэрэмжит өргөмжлөлөөр шагнууллаа.
   
Шагнал гардуулах ёслолын хоёр дахь удаагийн арга хэмжээ 11 дүгээр сард болох аж.