Шадар сайд С.Амарсайхан өчигдөр буюу 5-ны ням гарагт мах боловсруулах зарим аж ахуй нэгжийн үйл ажиллагаатай танилцжээ. Үйл ажиллагааг нь түр зогсоож битүүмжилсэн 17 үйлдвэрийн төлөөлөл болох дулааны аргаар мах боловсруулж, экспортолдог “Монгол эко мах” ХХК болон мал төхөөрөх, мах махан бүтээгдэхүүн боловсруулж, дотооддоо нийлүүлэх чиглэлээр үйл ажиллагаа явуулдаг “Натурал грийн фүүдс”, “Шилмүүст сүмбэр” компанийн үйлдвэрүүдээр орсон юм.
"Монгол Эко мах" компанийн агуулахад гэрээгээр 625 тонн адуу, 525 тонн ямааны мах боловсруулж хадгалаад байгаа ба мэргэжлийн хяналтын байгууллага 5-р сарын 23-нд болон 6-р сарын 1-нд шалгалт хийсэн. Тус аж ахуй нэгж нь цар тахал, хилийн хаалттай байдлын улмаас 2021 оны 10-р сарын 13-наас хойш үйл ажиллагаагаа явуулаагүй гэж мэдэгджээ. Энэхүү компани нь Хятадын хөрөнгө оруулалттай, монгол эзэнтэй, монгол ажилтнуудтай гэв.
Шадар сайд "Стандарт шаардлагыг хангуулах, хүнсний аюулгүй байдлыг хангах гэж л мэргэжлийн байгууллагууд ажилладаг. Үнэхээр шаардлага хангасныг нь үргэлжлүүлээд, улам сайжруулаад үйл ажиллагааг нь явуулна, боломжгүйг нь зөрчлийг нь арилгуулж, зөвлөж, дахин сайжруулах замаар ажиллуулах ёстой. Үйлдвэрүүдийн үйл ажиллагааны стандарт, тэдний үйл ажиллагааг нь хянасан, шат дараатай явцын тайлан гээд яг одоо үзүүлэх зүйл байна уу" хэмээн Мэргэжлийн хяналтын байгууллагыг шүүмжлээд стандартын шаардлага хангаж байгаа аж ахуйн нэгж байгууллагуудын үйл ажиллагааг нь үргэлжлүүлэх боломжоор нь хангаж ажиллахыг санууллаа.
Нөгөөтээгүүр ААН ч хяналтын байгууллагын зөвлөгөө, шаардлага, зөрчлөө арилгасан түүх, шат дараатай явцыг тэмдэглэж байхыг сануулсан юм. “Монгол эко мах”, “Шилмүүст сүмбэр” компаниудын хувьд цар тахлын нөхцөл байдлаас шалтгаалж 2020, 2021 онд үйл ажиллагаа нь зогсонги байгаад энэ жилээс үйлдвэрлэлээ эхлүүлжээ. Гэвч үйлдвэрийн байр агуулах, хүнсний бүтээгдэхүүн үйлдвэрлэх орчин нөхцөл бүрдээгүй, эрүүл ахуйн шаардлага хангаагүй гэдгийг Мэргэжлийн хяналт, Стандарт хэмжилзүйн байгууллагын мэргэжилтнүүд хэлж байсан юм. Тиймээс цаашид хүнсний үйлдвэрлэл эрхлэх эрүүл ахуйн стандартын шаардлага хангуулах үүрэг чиглэлийг өглөө.
