Гадаад харилцааны сайд Б.Батцэцэг, БНПУ-ын гадаад хэргийн сайд З.Рау нар албан ёсны хэлэлцээ хийсэн талаар мэдээлж байна. Энэ үеэр Гадаад харилцааны сайд Б.Батцэцэг үг хэллээ. Тэрбээр "Бүгд Найрамдах Польш улсын Гадаад хэргийн сайд З.Раутай албан ёсны хэлэлцээр хийлээ. Хэлэлцээрийн үеэр Монгол, Польшийн хамтын ажиллагаа өргөжиж буй талаар болон хамтын хэлэлцээрийн тухай санал солилцлоо. Тухайлбал, хоёр орны хамтын ажиллагаа, боловсрол, соёл урлаг, худалдаа, эдийн засаг, цахим үйлчилгээ, байгаль орчин зэрэг салбаруудыг улам бүр өргөжүүлэх талаар ярилцлаа. Мөн ойрын үед хэрэгжүүлэх дээд өндөр төвшний айлчлал, арга хэмжээний талаар санал солилцож,  эдгээр айлчлал, арга хэмжээ чухал гэдэгтэй санал нэгдлээ.  

Хоёр орны худалдааны эргэлт сүүлийн жилүүдэд нэмэгдэж байгааг онцолж,  түүнийг улам бүр эрчимжүүлэхэд чухал үүрэгтэй олон улсын авто тээврийн харилцааны тухай Монгол Улсын засгийн газар, Польш улсын засгийн газар хоорондын хэлэлцээрийг ойрын хугацаанд зохион байгуулахаар тохиролцлоо. Бүгд Найрамдах Польш улс Улаанбаатарт Элчин сайдын яамаа сэргээн нээснийг сайшаав. Энэ нь хоёр орны харилцаа хамтын ажиллагаа төдийгүй иргэд хоорондын харилцааг идэвхжүүлж байгааг онцоллоо. Уулзалтын үеэр хэлэлцсэн санал санаачилгыг бодит ажил хэрэг болгохын төлөө ажиллана гэдгээ талууд нотоллоо" гэв. 

Д.Батчулуун