УИХ дахь МАН-ын бүлгийн гишүүд мэдээлэл хийлээ. Энэ хүрээнд УИХ-ын гишүүн, МАН-ын бүлгийн дарга Д.Тогтохсүрэн дараах мэдээллийг өгсөн юм.

Тэрбээр “Монгол Улсын Үндсэн хуульд нэмэлт өөрчлөлт оруулах тухай асуудлаар улс төрийн нам, иргэдээс ирүүлсэн саналын тухай хэлэлцсэн. Өнгөрсөн сард иргэд, олон нийтийн хөдөлгөөн өрнөсний дараа Үндсэн хуульд нэмэлт өөрчлөлт оруулах шаардлагатай байна гэсэн саналыг УИХ-д өгсөн. Энэ асуудлаар УИХ-ын даргын захирамж гарч, ажлын хэсэг байгуулснаар гурван удаагийн хэлэлцүүлэг хийлээ. Үүнд, Үндсэн хууль судлаач, эрдэмтэд, 1992 оны Үндсэн хууль баталсан хүмүүсийн төлөөлөл, Монгол Улсад үйл ажиллагаа явуулж байгаа 26 намын удирдлагууд оролцсон юм. 

Үүний үндсэн дээр Төрийн байгуулалтын байнгын хороо өнгөрсөн долоо хоногт хуралдаж "Үндсэн хуульд нэмэлт өөрчлөлт оруулах, Сонгуулийн тогтолцоог боловсронгуй болгох чиглэлээр олон нийтийн саналыг авах нь зүйтэй" гэсэн шийдвэр гаргасан.

Тиймээс МАН-ын бүлэг энэ асуудлыг авч хэлэлцсэний үндсэнд Монгол Улсын Үндсэн хуульд нэмэлт өөрчлөлт оруулах асуудлаар олон нийтийн санал сонсох, хэлэлцүүлэг өрнүүлэх ажлыг улс орон даяар хийх шийдвэр гаргалаа. Хэлэлцүүлэг хийсний дараагаар санал оруулах ажлыг эхлүүлэх нь зөв" хэмээв.

Харин "хэлэлцүүлгийг хэзээ эхлүүлэх, ямар байдлаар хэрэгжүүлэх талаар тодорхой мэдээлэл байхгүй байна” гэв.

Т.Мөнхжаргал